Veiðisögur úr Blöndu og Víðidalsá

Þórður Sigurðsson leiðsögumaður sendi okkur eftirfarandi rapport af veiðum norðan heiða, en þar er hann að leiðsegja þjóðverja sem er í annarri heimsókn sinni til landsins. Við gefum Þórði orðið:

Rolf er búinn að vera að veiða síðust daga í Blöndu og í dag byrjaði hann í Víðidal. Það er óhætt að segja að á ýmsu hafi gengið í Blöndu. Í gær setti hann í 12 laxa og landaði tveimur. Hann varð fyrir því „óláni“ að setja í eitt af Blöndutröllunum í gær sem rétti upp krókana hjá honum. Sá fiskur var vel yfir 10 kg. Þegar hann átti Damminn sunnan megin setti hann í stóran fisk sem straujaði niður flúðirnar og hafði af honum skothaus, running línu og 20 metra af undirlínu.

Honum tókst að landa 5 stórlöxum þá tvo daga sem hann veiddi þar. Hann var frekar niðurbrotin eftir þessa meðferð í Blöndu og þegar komið var í Víðidal var búið að vera tregfiskerí þar. Fyrstu vaktina landaði hann 98 cm hæng. Að vonum var hann kátur með þessar fínu viðtökur í Víðidal. Einhverjir myndu kannski segja að hann hafi átt þetta inni.

Við þetta má svo bæta að Helgi Guðbrandsson landaði einnig einum vænum úr Harðeyrarstreng í gær, 101 cm að leng og tók sá hitchið.

Birt með góðfúslegu leyfi Lax-Á