Reiknar með stórflótta úr stétt hjúkrunarfræðinga eftir Covid-19

Formaður hjúkrunarráðs Landspítalans óttast flótta úr stéttinni eftir kórónuveirufaraldurinn verði kjör hjúkrunarfræðinga ekki bætt. Þeir hafa verið án kjarasamnings í meira en ár. 

Á meðan álag sé að aukast vegna farsóttarinnar séu hjúkrunarfræðingar einnig að missa vaktaálagsauka.

Erfitt að fá lægri laun á þessum tímum

Landspítalanum var gert síðast haust að ráðast í umfangsmiklar sparnaðaraðgerðir vegna rekstrarvanda. Þá var ákveðið að leggja niður svokallaðan vaktaálagsauka sem var 5 prósent ofan á heildarlaun þeirra sem unnu tiltekinn tímafjölda utan dagvinnu. Aðgerðin kom til framkvæmda nú um mánaðamótin.

Marta Jónsdóttir, formaður hjúkrunarráðs Landspítalans, kveðst undrandi á að þetta hafi orðið að veruleika miðað við stöðuna sem sé í gangi.

„Það er erfitt að fá svona fréttir í þessu ástandi núna af því hjúkrunarfræðingar hafa eins og aðrar stéttir í heilbrigðiskerfinu lagt sig alveg sérstaklega fram. Þá er dálítið súrt að fyrstu mánaðamótin eftir að allt fer í svona blússandi gang þá fái fólk lægri laun en það er vant að fá. Við erum búnar að vera kjarasamningslausar í meira en ár. Það er orðið löngu tímabært að semja.“

Sinna mjög veiku og hræddu fólki

Hún segir að mörgu að huga í þeim faraldri sem nú gangi yfir. Starfsfólk geti t.d. fengið sár eftir hlíðfarbúnað sem það klæðist ef sjúklingar eru með Covid-19.

„Fólk svitnar mikið undan honum, verður mjög heitt og getur verið erfitt að vera í honum til lengri tíma. Grímurnar þurfa að vera mjög þéttar á andlitinu og eins með gleraugun eða annan hlífðarbúnað sem þú ert með. Það þarf allt að vera mjög þétt sem veldur hættu á þrýstingssárum. Þetta er allt aukið álag plús allt andlega álagið sem fylgir því að vera að sinna mjög veiku og hræddu fólki.“

Marta óttast flótta úr stéttinni verði kjörin ekki bætt.

„Auðvitað skorumst við ekki undan þeirri ábyrgð sem hvílir á okkur en Covid mun líða hjá og heilbrigðiskerfið mun þurfa að virka eftir sem áður og það mun örugglega verða stórflótti úr stéttinni þá.“

Ekki launalækkun heldur tímabundið átak

Bjarni Benediktsson fjármálaráðherra var spurður út í stöðu hjúkrunarfræðinga í óundirbúnum fyrirspurnatíma á Alþingi í morgun. Ráðherra sagði vaktaálagið ekki hluta af miðlægum kjarasamningi heldur byggt á stofnanasamningi innan Landspítalans.

„Þetta birtist okkur sem launalækkun en var allan tímann hugsað sem tímabundið átak. Það eru margir mánuðir síðan það lá fyrir að átakinu myndi ljúka um þessar mundir," sagði fjármálaráðherra. Hann væri hins vegar bjartsýnn á að samningar næðust.

„Undir forystu ríkissáttasemjara höfum við náð að leysa þungamiðju málsins sem er vaktavinnufyrirkomulagið og stytting vinnuvikunnar. Leiðir til þess að búa til betra starfsumhverfi fyrir heilbgrigðisstarfsfólk sem sinnir þessum mikilvægu störfum í vaktavinnu," sagði Bjarni.