Heildarvelta ÍLS eykst um 46 prósent á milli mánaða

Alls námu heildarútlán Íbúðalánasjóðs rúmlega 2,5 milljörðum króna í maí. Í tilkynningu frá sjóðnum segir að þar hafi verið rúmir 1,8 milljarðar vegna almennra lána og rúmar 700 milljónir vegna leiguíbúðalána. Vanskil lána hjá sjóðnum voru 800 milljónir og eru þau 0.14 prósent frá byrjun árs en 1. janúar var hlutfallið 0,10 prósent.

Undirliggjandi lán þeirra vanskila sem um ræðir eru ekki skilgreind sem vanskil, heldur aðeins þeir gjalddagar sem eru ógreiddir, enda eru lán í vanskilum ekki gjaldfelld skv. reglum.

„Heildarútlán sjóðsins drógust saman um tæplega 11 prósent frá fyrra mánuði. Heildarútlán á fyrstu fimm mánuðum ársins nema tæpum 14,8 milljörðum, sem eru um 26 prósenta minni útlán en á sama tímabili 2008," segir einnig.

Þá segir að heildarvelta íbúðabréfa í maí nam tæplega 64,3 milljörðum, sem sé 46 prósent meiri velta en í fyrri mánuði. Heildarvelta bréfanna nemur 332,5 milljörðum það sem af er árinu 2009. Greiðslur Íbúðalánasjóðs námu um 701 milljón króna í maí og var stærstur hluti þeirra afborganir vegna húsnæðisbréfa.