Ólína segir þinginu stjórnað af nátttröllum

Taugastríð stjórnar og stjórnarandstöðu um þingstörfin heldur áfram og útlit fyrir að  annarri umræðu um fjárlög verði enn eina ferðina framhaldið fram á kvöld eða nótt. Þingmaður Samfylkingarinnar sagði ástandið í þinginu forystu þess til skammar og líkti forsetum þingsins við nátttröll á þingfundi í morgun.

Ólína Kjerúlf Þorvarðardóttir þingmaður Samfylkingarinnar minnti á það á Alþingi í morgun að þingfundi hefði verið slitið á fjórða tímanum í nótt og fundur í allsherjar- og menntamálanefnd hefði hafist fimm tímum síðar eða klukkan hálf níu í morun.

Ólína segir að ítrekað hafi verið gengið eftir svörum hjá þingforsetum hver verkáætlun Alþingis væri, en formlegri starfsáætlun þingsins lauk á föstudag.

„Það er talað inn í næturnar. Engin svör berast og menn sitja eins og nátttröll á stóli á bakvið einhvern kjánalegan þagnarskjöld og neita að upplýsa þingmenn um hvað þeim sé ætlað að gera. Hvernig verkáætlun þeirra eigi að líta út,“ sagði Ólína. Þingið setti niður við þessi vinnubrögð.

Einar K. Guðfinnsson forseti Alþingis sagði ástandið í þinginu vera óvanalegt.

„Meðan sú staða er uppi að ekki sér fyrir endann á þeirri umræðu sem stendur yfir um fjárlögin er forseta og forsætisnefnd gjörsamlega fyrirmunað að skipuleggja störf þingsins. Hvað þá boðið upp á einhvern fyrirsjáanleika,“ sagði Einar.

Þorsteinn Sæmundsson þingmaður Framsóknarflokksins og einn varaforseta Alþingis sagði umræðurnar um fjárlögin undanfarnar daga og nætur hafa verið góðar og upplýsandi.

En Ásmundur Einar Daðason þingflokksformaður Framsóknarflokksins sagði umræðuna hafa staðið hátt í sextíu klukkustundir og vísaði ábyrgðinni á ástandinu í þinginu til stjórnarandstöðunnar.

„Það er miður desember, það styttist til jóla og það er auðvitað ábyrgð stjórnarandstöðunnar að setja niður fyrir sig hvenær hún ætlar að ljúka þessari umræðu,“ sagði Ásmundur Einar.

Ólína sagði stífni stjórnarforystunnar kalla fram stífni hjá stjórnarandstöðunni og verið væri að búa til vandamál að ástæðulausu.

„Það er þess vegna sem þingið setur niður við þetta og ég hafna því algerlega að stjórnarandstaðan beri ábyrgðina á ástandinu í þessu húsi núna. Það er þingforystan sem á það algerlega skuldlaust og forsetarnir, sem sitja hér eins og steinrunnin nátttröll á stóli,“ sagði Ólína Kjerúlf Þorvarðardóttir.

Búast má við að umræður um fjárlög standi langt fram á kvöld eða nótt.