Ölvuð og erilsöm hrekkjavökunótt

Oft taka fréttamiðlar svo til orða að „mikill erill hafi verið hjá lögreglu“ þegar hún hefur þurft að sinna mörgum erindum.

Óhætt er að segja að það orðalag sé við hæfi þennan morguninn því að lögreglan þurfti að sinna rúmlega 50 málum í nótt - það er frá miðnætti til klukkan sex í morgun.

Flest málin tengdust ölvun að einhverju leyti en ófáir borgarbúar og nærsveitungar brugðu sér í allra kvikinda líki og reimuðu á sig dansskóna í nótt þegar þeir héldu hrekkjavökuna hátíðlega.

Sex ökumenn voru teknir úr umferð vegna gruns um að hafa ekið undir áhrifum áfengis og eða vímuefna. Þá gista þrír einstaklingar  í fangageymslu í þágu rannsóknar á þremur heimilisofbeldismálum.

Í miðborginni var tilkynnt um líkamsárás í miðborginni  skömmu fyrir klukkan sex í morgun. Ekki er vitað um geranda en hinn slasaði var fluttur á slysadeild til aðhlynningar en hann er ekki talin alvarlega slasaður.

Þá hefur lögreglan í austurbænum tekið til rannsóknar innbrot og þjófnað í kjallara þar sem skartgripum, sjónvarpi og fleiri munum var stolið.