Gibson valdamesta stjarna heims

Leikarinn og leikstjórinn Mel Gibson hefur verið valinn valdamesta stjarna heimsins af bandaríska viðskiptatímaritinu Forbes. Í valinu er farið eftir launum stjarnanna árið 2003, hversu oft þær komu fram í sjónvarpi, hversu mikið var fjallað um þær í dagblöðum og hversu oft var leitað að nöfnum þeirra á Netinu. Gibson, sem grætt hefur á tá og fingri á mynd sinni The Passion of the Christ, þénaði 210 milljónir dollara á síðasta ári, eða um 15 milljarða króna. Hinn 48 ára Gibson skaut þar með vininum fyrrverandi og sigurvegaranum frá því í fyrra, Jennifer Aniston, ref fyrir rass því hún endaði "aðeins" í sautjánda sæti. "Listinn breytist gífurlega mikið á milli ára," sagði Steve Forbes, ritstjóri tímaritsins. "Mel Gibson var ekki einu sinni á honum á síðasta ári. En The Passion of Christ hefur rakað inn peningum og mun örugglega setja nýtt met þegar allar aðsóknartölur verða komnar í hús. Gibson fékk líka mjög mikla umfjöllun, suma þar sem deilt var hart á hann, vegna þessarar myndar." Kylfingurinn Tiger Woods lenti í öðru sæti. Þrátt fyrir að hafa gengið brösulega á golfvellinum þénaði hann 80 milljónir dollara á árinu, sem gera um 5,7 milljarða króna. Þar af þénaði hann 70 milljón dollara af auglýsingum einum saman, eða um 5 milljarða. Spjallþáttastjórnandinn Oprah Winfrey komst í þriðja sæti listans. Hún þénaði jafn mikið og Gibson en beið lægri hlut þegar önnur atriði voru tekin með í reikninginn. Winfrey, sem varð fimmtug fyrr á þessu ári, er einnig efsta konan á listanum. Sú næsta á eftir, J.K. Rowling, höfundur Harry Potter-bókanna, er í sjötta sæti á eftir hjartaknúsaranum Tom Cruise og rokkhundunum í The Rolling Stones. Hún var í fimmtánda sæti árið á undan og hefur því rokið upp listann. Rowling, sem hefur selt meira en 250 milljónir eintaka af Harry Potter-bókunum fimm, þénaði 147 milljónir dollara, eða rúma tíu milljarða króna. Nokkra athygli vekur að körfuboltagoðsögnin Michael Jordan er í sjöunda sæti listans þrátt fyrir að vera hættur í boltanum. Kappinn þénaði 35 milljónir dollara á árinu, eða um 2,5 milljarða króna. Þar af fékk hann um 1,8 milljarða fyrir að auglýsa íþróttavörur frá Nike. Á meðal fleiri stjarna á listanum, sem náði yfir 100 manns, var fótboltatöffarinn David Beckham. Hann komst í 22. sæti, sem er mikið stökk frá því í fyrra þegar hann náði aðeins 56. sæti. Steve Forbes segir að koma Beckhams til Real Madrid hafi gert hann að stærri stjörnu en áður. "Beckham fær sífellt meiri umfjöllun í Bandaríkjunum og það sýnir að fleiri íþróttastjörnur en áður eru að verða að alþjóðlegum stjörnum."