Finnur Árnason: Höfum engar áhyggjur, við erum með besta liðið

„Við höfum áður sagt það að aðgangur að þessum markaði er mjög opinn, við munum einbeita okkur að viðskiptavinum fyrirtækisins og okkar tími og orka mun fara í það," segir Finnur Árnason, forstjóri Haga, spurður út í boðaða komu Jóhannesar Jónssonar á lágvöruverslunarmarkað hér á landi.

Jóhannes ætlar að opna lágvöruverslun hér á landi síðsumar en það er breski athafnamaðurinn Malcom Walker sem á fyrirtækið með honum. Walker á og rekur Iceland Foods í Bretlandi, en sú keðja rekur 800 verslanir víða um Bretland.

Finnur segir það ekkert nýmæli að nýjir aðilar komi inn á þennan markað og segir verslunum hafi fjölgað á síðustu þremur árum. „Þetta hefur legið fyrir en við hugsum bara fyrst og fremst um okkar viðskiptavini," segir Finnur. Spurður hvort hann hafi áhyggjur af innreið Jóhannesar á markaðinn, gamla eiganda Haga, svarar Finnur:

„Nei, við höfum engar sérstakar áhyggjur, enda með besta liðið."

Hagar hafa birt ársreikning sinn fyrir árið 2011. Þar kom fram að hagnaður Haga á síðasta rekstrarári nam 2,3 milljörðum króna eða 3,4% af veltu. Athygli vekur þó að hlutabréfin í Högum lækkuðu um tæp þrjú prósent í dag. Viðskiptin á bak við lækkunina eru um 150 milljónir króna.

Finnur segir fyrirtækið ekki tjá sig um gengi hlutabréfanna.