Bílalánin í uppnámi

Mikil óvissa ríkir um rétt lánastofnana til að innheimta greiðslur af myntkörfulánum eftir að Héraðsdómur Reykjavíkur dæmdi slík lán ólögmæt. Félagsmálaráðherra vill að málið fái flýtimeðferð hjá Hæstarétti. Hagsmunasamtök heimilanna krefjast þess að nauðungarsölum verði frestað þangað til niðurstaða hæstaréttar liggur fyrir.

Fjármögnunarfyrirtækið Lýsing stefndi viðskiptavini á síðasta ári sem var hættur að greiða af láni vegna kaupleigusamnings um bifreið.

Lánið var að hluta gengistryggt. Héraðsdómari komst að þeirri niðurstöðu að ákvæði samningsins um gengistryggingu væri í raun ólögmæt verðtrygging þar sem lánið hafi verið veitt í íslenskum krónum.

Íslensk heimili skulda um 200 milljarða í gengistryggðum lánum og hefur niðurstaða héraðsdóms sett þessi lán í uppnám.

„Þarna er héraðsdómarinn að skilja lögin með þeim hætti sem við og fjöldi annarra lögmanna hafa skilið þau, auk fræðimanna líka," segir Björn Þorri Viktorsson, lögmaður.

Lýsing hefur áfrýjað málinu til hæstaréttar en Björn telur ólíklegt að lánastofnanir geti haldið áfram að innheimta greiðslur af myntkörfulánum á meðan niðurstaða hæstaréttar liggur ekki fyrir. „Ekki á grundvelli þessara lána. Ef að þessi niðurstaða stendur," segir Björn Þorri en bendir á að því skuli haldið til hafa að málið eigi líklegast eftir að fara fyrir Hæstarétt. „En að sjálfsögðu stendur slílk innheimta ekki."

Friðrik Ó. Friðriksson, formaður Hagsmunasamtaka heimilanna telur einboðið að fresta nauðungasölum á meðan beðið er eftir niðurstöðu hæstaréttar. „Það er fjöldi af nauðungarsölum í farvatningu. Það á að fara dæma fólk til eignasviptinga meðal annars byggðum á þessum samningum og í ljósi óvissu þá teljum við það mjög mikið mikla glöp og handvömm í raunin ef fólk verður keyrt í þrot út frá slíkri lagaóvissu."

Árni Páll Árnason félagsmálaráðherra segir að vonast verði til þess hæstiréttur taki fljót á þessu máli. „Það skiptir miklu máli að þetta mál fái flýtimeðferð þannig að við fáum niðurstöðu hæstaréttar sem fyrst í þessu máli," segir Árni og bætir því við að miklu máli skipti að vita hvort þessi lán séu lögleg. „Það hefur mikil áhrif á mat á heildarstöðunni."