Atvinnulíf

Fjarvinna með börnin heima: Dó ekki ráðalaus og bjó til „virkni-bingó“

Rakel Sveinsdóttir skrifar
Elín María Halldórsdóttir með börnunum sínum tveimur, 5 og 9 ára. Elín rekur fyrirtækið Komma Strik en vinnur í fjarvinnu að heiman þessa dagana. Hún bjó til skemmtilega afþreyingu til að hafa ofan af fyrir börnunum, virkni-bingó sem hefur slegið í gegn.
Elín María Halldórsdóttir með börnunum sínum tveimur, 5 og 9 ára. Elín rekur fyrirtækið Komma Strik en vinnur í fjarvinnu að heiman þessa dagana. Hún bjó til skemmtilega afþreyingu til að hafa ofan af fyrir börnunum, virkni-bingó sem hefur slegið í gegn. Vísir/Helga Guðrún Lárusdóttir

Elín María Halldórsdóttir grafískur hönnuður dó ekki ráðalaus þegar hún stóð frammi fyrir því að reyna að vinna að heiman, með börnin og eiginmanninn heima líka og tilheyrandi truflunum. Því eins og margir hafa reynt á eigin skinni síðustu daga, getur slík fjarvinna verið þrautinni þyngri. Það sem Elín gerði var að búa til virkni-bingó. Í því þurfa þátttakendur meðal annars að semja sögur og teikna við hana mynd, hringja í vin eða fjölskyldumeðlim, hlaupa í 30 sekúndur, læra Daða-dansinn og margt fleira skemmtilegt.

Elín María er búsett á Selfossi og rekur fyrirtækið sitt Komma Strik þar. Síðustu daga hefur hún unnið í fjarvinnu að heiman. Þar eru líka eiginmaðurinn sem er frá vinnu þessa dagana og börnin þeirra tvö, 5 og 9 ára. Skóladagskrá beggja barna hefur raskast og dagarnir þar verið styttri.

„Ég fann að ég þurfti eitthvað til að hjálpa mér og börnunum með hugmyndir yfir daginn og gerði því þetta litla virknibingó,“ segir Elín.  

Virknibingóið var strax að virka vel heima fyrir og ákvað Elín því að leyfa öðrum í sömu stöðu að njóta þess. Á vefsíðuna Kommastrik.is eru leiðbeiningar en bingóið má nálgast hér

Á spjöldunum eru verkefni sem flest börn ráða við eins og að gera 20 armbeygjur eða semja dans við skemmtilegt lag.

Elín María fann að hún varð að gera eitthvað til að hjálpa börnunum með hugmyndir yfir daginn og bjó til virkni-bingó.Vísir/Aðsent

Sænskir vinir höfðu samband

Fjölskyldan bjó lengi í Svíþjóð og segir Elín stöðuna hjá vinum og fyrri nágrönnum þeirra þar vera þá sömu og hér. Fór svo að einn vinur hennar, sem hafði séð bingóið á Facebooksíðu Elínar, spurði hvort hún væri til í að útbúa bingóið á sænsku líka.

Sem hún og gerði og því má segja að Elín María sé farin í útrás með virknibingóið.

Önnur útgáfa á leiðinni

Elín segir að fjölskyldan sé þegar byrjuð að vinna í næstu útgáfu „Því við erum nú þegar búin með öll verkefnin á fyrstu útgáfunni,“ segir Elín. 

Að sögn Elínar hafa viðtökurnar við bingóinu verið það góðar að augljóslega séu margir foreldrar að glíma við það sama og hún. Eftirspurnin sé því mikil fyrir einhverju sem er auðvelt fyrir krakka að læra og hafa gaman af á meðan allir eru bundnir meira heimavið.

Elín bendir samt á að bingóið er alls ekki aðeins fyrir börn og hvetur foreldra til að taka þátt í því líka. 


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.