Samruni Storytel og Forlagsins blásinn af

Kristín Ólafsdóttir skrifar 21. desember 2020 15:12

Á myndinni má sjá þá sem að samingsgerðinni komu: Standandi: Kristófer Jónasson frá LOGOS, Gunnar Sturluson frá LOGOS, Stefán Hjörleifsson, landsstjóri Storytel á Íslandi og Árni Einarsson, stjórnarmaður í Mál og menningu og Forlaginu. Sitjandi: Þórhildur Garðarsdóttir, fjármálastjóri Forlagsins, Röstan Panday, stjórnarformaður Storytel AB, Egill Örn Jóhannsson, framkvæmdastjóri Forlagsins, Soffía Eydís Björgvinsdóttir frá KPMG og Halldór Guðmundsson, stjórnarformaður Máls og menningar og Forlagsins. Aðsend

Ekki verður af fyrirhuguðum samruna Forlagsins og Storytel sem tilkynnt var um í sumar. Þetta kemur fram í sameiginlegri tilkynningu Storytel og Forlagsins, þar sem einnig er greint frá undirritun „langtímasamnings“ milli fyrirtækjanna um dreifingu hljóð- og rafbóka. Teikn voru á lofti um að Samkeppniseftirlitið myndi ekki samþykkja samrunann, að sögn landsstjóra Storytel á Íslandi.

Storytel tilkynnti um fyrirætlanir sínar um kaup á 70% hlut í Forlaginu, stærstu bókaútgáfu landsins, í sumar. Annar seljanda og eigandi meirihluta hlutafjár í Forlaginu, bókmenntafélagið Mál og menning átti að fara áfram með 30% hlut í félaginu sem var ætlað að starfa áfram sem sjálfstætt bókaforlag, aðskilið frá streymisveitu Storytel á Íslandi. Fyrirhugaður samruni var háður samþykki Samkeppniseftirlitsins.

Í tilkynningu frá Storytel og Forlaginu í dag segir að fyrirtækin hafi komist að „langtímasamkomulagi“ sem feli í sér „stórátak í raf- og hljóðbókavæðingu bóka Forlagsins og dreifingu efnisins hjá Storytel, að fengnu samþykki höfunda hverju sinni.“

Þannig hafi samningsaðilar sett sér það markmið að framleiða að minnsta kosti 600 hljóðbækur á næstu árum, bæði nýja og gamla titla. „Þetta þýðir að tilkynning um fyrirhugaðan samruna hefur formlega verið dregin til baka,“ segir í tilkynningu.

Haft er eftir Stefáni Hjörleifssyni landsstjóra Storytel á Íslandi að fyrirtækin hafi undanfarna daga leitað „bestu mögulegu lausna fyrir íslenska hlustendur, lesendur og höfundar“. Niðurstaðan sé samkomulagið sem undirritað var í dag.

Teikn á lofti um að samruninn yrði ekki samþykktur

Samruninn varð nokkuð umdeildur þegar tilkynnt var um hann í sumar. Vísir greindi frá því að rithöfundar væru uggandi yfir fréttunum og símalínur Rithöfundasambands Íslands hefðu verið rauðglóandi í kjölfar fréttanna.

Ragnheiður Tryggvadóttir framkvæmdastjóri sambandsins sagði að áhyggjur rithöfunda sneru að mörgum þáttum er varðaði samninginn. Helsta áhyggjuefnið væri þau áhrif sem það kynni að hafa á íslenska bókaútgáfu að erlendur aðili ætti 70 prósenta hlut í stærsta bókaforlagi landsins.

Stefán Hjörleifsson landsstjóri Storytel á Íslandi segir í samtali við Vísi að þessi óánægja rithöfunda hafi ekki haft áhrif á ákvörðunina um að rifta samrunanum. Skiptar skoðanir hafi verið um fyrirætlanirnar, jákvæðar og neikvæðar, og Storytel hafi fundið fyrir auknum áhuga á vettvangnum meðal höfunda undanfarið.

Samruninn var tilkynntur til Samkeppniseftirlitsins sem kallaði eftir sjónarmiðum í ágúst síðastliðnum. Stefán segir að teikn hafi verið á lofti um að eftirlitið hygðist ekki samþykkja samrunann, þó að úrskurður þess efnis liggi ekki fyrir. Því hefði verið ákveðið að draga samrunann til baka. Með samningnum í dag væri farin „mildari leið“ til að bjóða upp á efnið sem um ræðir.

Vísir hefur sent Páli Gunnari Pálssyni forstjóra Samkeppniseftirlitsins fyrirspurn vegna málsins.

Fréttin hefur verið uppfærð.

Bókaútgáfa Menning Bókmenntir