Atvinnulíf

Klikkuð hugmynd sett í framkvæmd og varan seldist upp

Rakel Sveinsdóttir skrifar
Kjartan Gíslason og Óskar Þórðarson í Omnom.
Kjartan Gíslason og Óskar Þórðarson í Omnom. Vísir/Vilhelm

„Kannski að ná að hafa tekið þessa klikkuðu hugmynd og klárað hana með vöru sem seldist svo strax upp, þegar við byrjuðum með þetta fyrir jólin 2013,“ segir Kjartan Gíslason einn eigenda Omnom aðspurður um það hvað stæði uppúr í minningunni sem einn stærsti áfanginn í rekstri frá því að fyrirtækið hóf starfsemi. 

En nú þegar heimsfaraldur gengur yfir, segir Óskar Þórðarson mjög sérstakar aðstæður uppi sem einnig er vert að nefna. 

„Nú í dag var að snúa rekstrinum við í miðjum Covid faraldri og þar spilaði umfjöllun um okkur í þættinum hans Zac Efron í sumar,“ segir Óskar og bætir við: „Það hefur opnað fyrir okkur marga nýja möguleika með útflutning sem við erum þessa stundina að vinna í.“

Omnom er eitt þeirra fyrirtækja sem stofnað var eftir bankahrun. Hjá fyrirtækinu starfa nú hátt í þrjátíu starfsmenn í fullu starfi eða hluta starfi. Flestir starfa við framleiðslu en eins við afgreiðslu í ísbúð.

Hófst í eldhúsinu heima

Starfsemi Omnom hófst árið 2013. Stofnendur voru fjórir, þ.e. þeir félagar Óskar og Kjartan og síðan Karl Viggó Vigfússon og Andre Úlfur Visage. 

Óskar og Kjartan eru enn eigendur en til viðbótar einnig svissneska fjárfestingarfélagið Quadia. Það keypti hlut í Omnom árið 2017 og varð við það annar stærsti hluthafinn.

Omnom framleiðir súkkulaði frá grunni, eða það sem kallast frá baun í bita. Til þess að geta það flytur Omnom inn sínar eigin kakóbaunir og ristar. 

Fyrstu skrefin í súkkulaðigerðinni voru tekin í eldhúsinu heima hjá Kjartani í Breiðholti. Þá voru gerðar tilraunir í kjölfar þess að félagarnir höfðu fjárfest í vélum og kakóbaunum.

Síðar rákust félagarnir á húsnæði á Seltjarnarnesi sem áður hafði hýst bensínstöð. Þangað flutti starfsemin í nóvember 2013.

Og það var þar sem boltinn fór að rúlla.

Að sögn félaganna vakti staðsetningin þó misskilning hjá mörgum í upphafi sem héldu að enn væri þar starfrækt bensínstöð. Það komu því margir við þar til að biðja um að fá að pissa eða til að kaupa sér sígarettur. 

Einstaka túristi stakk líka hausnum inn og bað um vegaleiðbeiningar. Þá var ekkert annað en að reyna að selja þeim súkkulaði í leiðinni.

En ef einn stærsti áfanginn var fullunnin vara sem seldist upp fyrir jólin 2013, hver er erfiðasti hjallinn í minningunni?

Líklegast var erfiðasti hjallinn sú stækkun sem við fórum í 2016 að færa framreiðsluna úr bensínstöð út á Seltjarnarnesi yfir í núverandi húsnæðið okkar á Grandanum,“ 

segir Kjartan en Omnom er nú staðsett að Hólmaslóð 4.

Kjartan Gíslason og Hildur Halldórsdóttir, Omnom.Vísir/Vilhelm

Vaxtarstökk í Covid

Þótt áskoranir í heimsfaraldri séu mörgum fyrirtækjum erfiðar rekstrarlega, hefur sala Omnom þó einnig stóraukist síðustu mánuði og þá sérstaklega í sumar.

Er sú söluaukning erlendis frá.

Við erum mestmegnis núna að einbeita okkur á útflutning til Bandaríkjanna, þar sem viðtökurnar hafa verið mjög góðar síðan 2014 og hefur salan þar stóraukist á milli ára og þá sérstaklega í sumar,“ 

segir Kjartan.

„Við erum nú í yfir 400 verslunum þar og erum að auki með sér netverslun, sem hefur reynst okkur vel. Við ætlum að einbeita okkur á þeim markaði en erum einnig með aðila í Þýskalandi og Kanada sem við sjáum mikil tækifæri í,“ segir Óskar.

Omnom er fyrsta og eina fyrirtækið á Íslandi sem framleiðir súkkulaði frá grunni. Þeir félagar segja að mörg mistök hafi verið gerð í upphafi en það tók um eitt og hálft ár að gera uppskriftirnar.

Frá upphafi hefur Omnom lagt áherslu á fallega hannaðar umbúðir og segja Kjartan og Óskar að það hafi ekki farið mikið minni tími í að hanna þær umbúðir. En fyrir vikið hefur Omnom vakið athygli víða og fengið umfjöllun erlendis og hérlendis.

Hvaða ráð mynduð þið gefa aðila sem hefur hug á að stofna til reksturs nú sem ekki telst hefðbundinn og er nýr á nálinni?

„Aðalmálið fyrir okkur var að við höfðum trú á hugmyndinni og sáum fyrir okkur hvar við vildum vera eftir fimm ár,“ segir Kjartan og Óskar bætir við: 

Við höfum ekki staldrað lengi við mistökin okkar, heldur reynt að læra af þeim. Við höfum verið opnir fyrir gagnrýni, en á sama tíma reynt að halda í þann eldmóð sem við höfðum fyrir hugmyndinni í upphafi.“


Tengdar fréttir

Keypti fyrirtækið þremur vikum fyrir bankahrun

Rödd lítilla fyrirtækja er of veik segir Hildur Guðnadóttir meðal annars í viðtali en hún keypti fyrirtækið Satúrnus þremur vikum fyrir bankahrun. Árið 2010 stofnaði hún síðan Ömmu Mús - handavinnuhús.

Hringdu í fjárfesta í níu ár og velta nú milljarði

Benedikt Skúlason framkvæmdastjóri Lauf Forks segir umhverfi fjármögnunar nokkuð vanþróað á Íslandi fyrir nýsköpun. Fyrirtækið veltir nú tæpum milljarði og gerir ráð fyrir miklum vexti næstu árin.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×