Aftur höfðu lærisveinar Solskjærs betur gegn PSG

Anton Ingi Leifsson skrifar
Bruno og Rashford voru báðir á skotskónum í kvöld. Þeir fagna hér marki þess fyrr nefnda.
Bruno og Rashford voru báðir á skotskónum í kvöld. Þeir fagna hér marki þess fyrr nefnda. Xavier Laine/Getty Images

Manchester United sótti góð þrjú stig til Frakklands er liðið vann 2-1 sigur á PSG í fyrstu umferð Meistaradeildar Evrópu þetta tímabilið.

Flestir búast við því að PSG og Man. United fari upp úr H-riðlinum en einnig í riðlinum eru Leipzig og Istanbul Basaksehir. Leipzig vann leik liðanna í Þýskalandi í kvöld 2-0.

Man. United fékk vítaspyrnu á 23. mínútu eftir að brotið var á Anthony Martial. Á punktinn steig Bruno Fernandes en Keylor Navas gerði sér lítið fyrir og varði frá honum.

Eftir skoðun VARsjánnar kom hins vegar í ljós að Navas var farinn af línunni og því þurfti að endurtaka spyrnuna. Bruno tók aftur boltann og skoraði og kom gestunum yfir.

PSG reyndi og reyndi að jafna en lærisveinar Ole Gunnar Solskjær voru yfir í hálfleik. Sú forysta hélt ekki lengi því á 55. mínútu jöfnuðu PSG. Hornspyrna Neymar fór af kollinum á Anthony Martial og í netið. 1-1.

Bæði lið fengu sín færi til þess að skora sigurmarkið en sigurmarkið kom svo á 88. mínútu. Marcus Rashford fékk þá boltann rétt fyrir utan teiginn og skoraði með algjöru þrumuskoti. Glæstur sigur United sem minnti á sigurinn í París fyrir rúmu ári síðan.

Bein lýsing

Leikirnir






    Fleiri fréttir

    Sjá meira