Heimsmarkmiðin

Jemen: Rúmlega eitt þúsund fyrrverandi fangar fluttir heim

Heimsljós
Rauði krossinn

Verið er að flytja rúmlega eitt þúsund einstaklinga sem hafa verið í haldi í tengslum við átök í Jemen til síns heima með aðstoð Alþjóðaráðs Rauða krossins (ICRC). Þetta er stærsta einstök aðgerð sinnar tegundar frá því átökin hófust í Jemen fyrir fimm og hálfu ári og hægt er fylgjast með henni í rauntíma.

Alþjóðaráðið sér um flug til og frá nokkrum borgum í tveimur löndum – Jemen og Sádi-Arabíu. Lausn fanganna kemur í kjölfar viðræðna í Montreux í Sviss í síðasta mánuði sem byggðu á grunni Stokkhólmssamningsins frá seinni hluta ársins 2018. Hlutverk Alþjóðaráðsins í aðgerðinni er að starfa sem hlutlaus milliliður við flutning fyrrum fanga.

Af hálfu Alþjóðaráðsins eru tekin viðtöl við einstaklingana og þeir fara í heilsufarsskoðun til að fá vissu fyrir því að þeir vilji vera fluttir heim og séu nógu heilbrigðir til þess. Alþjóðaráðið veitir þeim einnig föt, hreinlætisvörur og peninga fyrir flutningi heim.

Samkvæmt frétt Rauða krossins á Íslandi dreifir Alþjóðaráðið hlífðarbúnaði og sinnir sóttvörnum og fjarlægðartakmörkunum í flugvélum og á flugvöllum til verndar gegn COVID-19 smitum. Heilbrigðisstarfsfólk og sjálfboðaliðar frá jemenska Rauða hálfmánanum og sádi-arabíska Rauða hálfmánanum veita aðstoð við flutningana, þar á meðal að hjálpa veikburða föngum til og frá borði og annast sjúkraflutninga.

Hér má fylgjast með aðgerðinni í beinni:

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.



×