81 greindist með kórónuveiruna innanlands í gær: 80 prósent í sóttkví við greiningu

Sunna Kristín Hilmarsdóttir skrifar 15. október 2020 11:00

Myndin er tekin fyrr í mánuðinum þegar löng röð myndaðist eftir því að komast í skimun hjá Heilsugæslu höfuðborgarsvæðisins. Vísir/Vilhelm

Alls greindist 81 með kórónuveiruna innanlands í gær. Þetta kemur fram í uppfærðum tölum á covid.is. 1.170 eru nú í einangrun með kórónuveiruna hér á landi og hafa aldrei verið fleiri.

Af þeim 81 sem greindist með veiruna í gær voru aðeins 16 utan sóttkvíar. Það þýðir að mikill meirihluta þeirra sem greindust, eða 65 manns, voru í sóttkví við greiningu.

Það er hæsta hlutfall sem hefur sést til þessa, að því er fram kom í máli Þórólfs Guðnasonar, sóttvarnalæknis, á upplýsingafundi almannavarna sem hófst klukkan 11:03.

Nú eru 3.035 manns í sóttkví. Nýgengi smita innanlands er 281,2 og hefur aldrei verið hærra síðan faraldurinn hófst hér á landi síðasta vetur.

Nýgengi landamærasmita er 9,0 en alls greindust átján manns í skimun á landamærunum í gær Beðið er eftir mótefnamælingu í öllum tilfellum. Er þetta óvenju há tala en um var að ræða hóp fólks sem var á ferðalagi innanlands að sögn Þórólfs.

26 manns eru inniliggjandi á Landspítalanum vegna Covid-19. Þar af eru þrír á gjörgæslu og tveir þeirra í öndunarvél.

Fréttin hefur verið uppfærð.

Faraldur kórónuveiru (COVID-19)

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.