Innsýn á gjörgæsludeild Landspítala á tímum Covid

Nú stendur þriðja bylgja kórónuveirufaraldsins sem hæst hér á landi og greindust 97 Íslendingar með kórónuveiruna í gær. Veiran veldur Covid-19 sjúkdómnum.

Mikið mæðir á gjörgæsludeild Landspítala í Fossvogi. Þar liggur talsverður fjöldi Covid-19 sjúklinga, ráðstafanir eru umfangsmiklar, öryggis gætt í hvívetna og viðbúnaðurinn mikill. Ljósmyndari Landspítala leit við í vikunni og skrásetti það sem fyrir augu bar eins og segir í Facebook-færslu Landspítala.

Gjörgæsludeildir Landspítala eru á tveimur stöðum, annars vegar í Fossvogi og hins vegar við Hringbraut. Þær sinna báðar hefðbundinni gjörgæslumeðferð og vöknun eftir aðgerðir, rannsóknir, svæfingar og deyfingar. Nokkur sérhæfing er milli þeirra í samræmi við skiptingu sérgreina. Covid-sjúklingum er bæði sinnt í Fossvogi og á Hringbrautinni. 

Hér að neðan má sjá myndaseríu frá gjörgæsludeildinni í Fossvoginum. Sem stendur eru þrír á gjörgæsludeild spítalans og allir í öndunarvél.