Heimsmarkmiðin

Söfnunarfé SOS Barnaþorpanna komið til Beirút

Heimsljós
Ljósmynd frá Beirút:
Ljósmynd frá Beirút: SOS Barnaþorpin

Níu evrópsk samtök SOS Barnaþorpa söfnuðu 84 milljónum króna í neyðarsöfnun vegna sprenginganna í Beirút, höfuðborg Líbanons, í byrjun ágústmánaðar. SOS Barnaþorpin á Íslandi tóku þátt í söfnuninni og Íslendingar lögðu af mörkum eina og hálfa milljón króna. Söfnunarfé hefur verið sent til Beirút til stuðnings við neyðaraðgerðir eftir sprenginguna.

SOS Barnaþorpin leggja áherslu á að aðstoðin nái til barna sem hlutu andlegan, líkamlegan og félagslegan skaða. Einnig börn sem misstu foreldra eða forráðamenn og þurfa á umönnun að halda, börn sem eiga í hættu að missa foreldraumsjá, búa hjá tekjulitlum fjölskyldum eða búa á heimilum einstæðra mæðra.

Beinn stuðningur felst að sögn Hans Steinars Bjarnasonar upplýsingafulltrúa SOS Barnaþorpanna meðal annars í því að 130 fjölskyldur fá fjárhagslegan stuðning, 120 börnum er tryggður stuðningur við menntun gegnum spjaldtölvur, 50 börn fá nauðsynlega lyfjameðferð og 75 börn fá stuðning á sérstökum barnvænum svæðum. Þá hafa 5 til 10 börn sem misstu foreldra sína fengið tímabundna umönnun eða til lengri tíma í fjölskylduumhverfi í SOS barnaþorpi.

Hans Steinar segir að sálfræðingar og annað heilbrigðisstarfsfólk á vegum SOS Barnaþorpanna séu til staðar í Beirút og áfram sé fylgst með berskjölduðum börnum og fjölskyldum sem gætu þurft á aðstoð að halda.

Hamfarirnar kostuðu minnst 135 mannslíf, yfir fjögur þúsund særðust og um 300 þúsund misstu heimili sín.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.