Atvinnulíf

Líðan starfsfólks snýst ekki um það sem er í tísku hverju sinni

Rakel Sveinsdóttir skrifar
Ragnhildur Bjarkadóttir sálfræðingur og eigandi Auðnast.
Ragnhildur Bjarkadóttir sálfræðingur og eigandi Auðnast. Vísir/Vilhelm

„Heilsu er auðvitað hægt að skipta upp í ótal flokka, en til þess að einfalda málin að þá skiptum við henni í líkamlega heilsu, andlega heilsu og félagslega heilsu. Undir þessum þremur flokkum eru svo nánari flokkanir eins og fagleg heilsa, geðheilsa og persónuleg heilsa til þess að taka dæmi“ segir Ragnhildur Bjarkadóttir sálfræðingur og eigandi Auðnast. Hún segir of algengt að stjórnendur vilji gera hlutina hratt, klára að tikka í öll boxin og fylgi jafnvel eftir tískustraumum. „Þegar verið er að vinna með vellíðan fólks þarf að gefa sér tíma til þess að kortleggja hvað vinnustaðurinn þarf í raun og veru, til dæmis með áhættumati eða ítarlegum heilsufarsviðtölum við starfsfólk“ segir Ragnhildur.

Í dag fjallar Atvinnulífið á Vísi um velferðarþjónustu fyrir starfsfólk vinnustaða. Í þessari annarri grein af tveimur er rætt við Ragn hildi Bjarkadóttur sálfræðing og eiganda Auðnast, en Auðnast er eitt þeirra fyrirtækja sem býður vinnustöðum upp á heildræna heilsustefnu fyrir starfsfólk.

Jafnvægið skiptir mestu máli

Að sögn Ragnhildar er ekki hægt að segja að einhver einn flokkur skipti meira máli en annar. Gullni meðalvegurinn finnist í jafnvæginu þarna á milli.

„Við erum alltaf að sjá það betur og betur að það er jafnvægið sem skiptir mestu máli, það er allir flokkarnir skipta jafn miklu máli“ segir Ragnhildur og bætir við „Þetta helst allt í hendur og flokkarnir hafa áhrif á hvorn annan.“

Að sögn Ragnhildar er þeirra reynsla sú að oftast sé best að byrja á andlegu heilsunni, til dæmis geðheilsu eða persónulegri heilsu.

„Þar erum við að tala um sjálfsmynd, hugsun, tilfinningar og fleira í þeim dúr. Stundum er það samt þannig að líkamleg einkenni sjúkdóma eða streitu eru það mikil að fyrst þarf að vinna á þeim svo hægt sé að byrja að vinna með rót vandans“ segir Ragnhildur.

Þá segir hún alla þá flokka sem hér hafa verið tilgreindir vera atriði sem hafa áhrif á það hvernig fólki gengur almennt í starfi eða frammistaða þeirra mælist.

Dæmi um flokkun á heilsu er heilsuflokkun Auðnast.

Geta vinnustaðir sett sér markmið um velferð og heilsu teyma eða eru þetta alltaf einstaklingsmiðuð verkefni?

„Það er sannarlega hægt að vinna með teymi og auka heildaránægju teymisins. Í þeirri vinnu er hins vegar alltaf einstaklingsmiðuð vinna líka og það gefur auga leið að ef einstaklingarnir innan hópsins eru ekki tilbúnir til að gera breytingar eða vinna að sameiginlegu markmiði að þá mun teymisvinnan ekki ganga vel“ segir Ragnhildur og bætir við ,,Þar af leiðandi er mikilvægt að teymisvinna sé hugsuð út frá einstaklingunum í teyminu og að unnið sé með hvern og einn einstakling en á sama tíma að sú vinna sé í takti við skilgreind markmið teymisvinnunnar.“

En hver eru algeng mistök hjá stjórnendum sem vilja standa vel að þessum málum?

„Allt of oft er verið að einblína á það að tikka í box og gera hlutina hratt. Þegar verið er að vinna með vellíðan fólks að þá þarf að gefa sér tíma til þess að kortleggja hvað vinnustaðurinn og starfsfólkið þarf í raun og veru, til dæmis með áhættumati eða ítarlegum heilsufarsviðtölum við starfsfólk.

Ekki hvað er í tísku þessa stundina eða hvað allir aðrir eru að gera, af því kannski á það ekkert við teymið þitt eða vinnustaðinn þinn.

Þegar að þessari þarfagreiningu er lokið er það í flestum tilvikum nokkuð skýrt hvar þarf að gera breytingar og þá er hægt að teikna upp skýra aðgerðaáætlun sem síðan er kynnt starfsfólkinu“ segir Ragnhildur.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.