Viðskipti innlent

Líf­eyris­sjóðir sagðir ætla að hefja gjald­eyris­kaup á ný

Kristín Ólafsdóttir skrifar
Ásgeir Jónsson er Seðlabankastjóri.
Ásgeir Jónsson er Seðlabankastjóri. Vísir/vilhelm

Samkomulag Seðlabanka Íslands við lífeyrissjóðina um að þeir gerðu hlé á gjaldeyriskaupum verður ekki framlengt þegar það rennur út í næstu viku. Þetta herma heimildir Fréttablaðsins sem segja engan vilja til þess hjá sjóðunum að halda áfram að sér höndum í erlendum fjárfestingum sínum.

Samkomulagið hefur varað frá því í mars, eða þegar kórónuveiran lét fyrst á sér kræla, en tilgangur þess er að bregðast við miklum samdrætti útflutnings af völdum faraldursins og stuðla að stöðugleika á gjaldeyrismarkaði.

Bent er á það í blaðinu að þrátt fyrir samkomulagið hafi gengi krónunnar gefið eftir um liðlega 20 prósent gagnvart evru á árinu. Það hefur gerst þrátt fyrir að lífeyrissjóðirnir hafi haldið að sér höndum í gjaldeyriskaupum og þrátt fyrir að Seðlabankinn hafi selt úr gjaldeyrisforða sínum fyrir rúmar 200 milljónir evra. Þetta hefur spornað gegn enn meiri gengisveikingu en ella hefði orðið.

Í blaðinu segir þó einnig að ólíklegt verði að teljast að sjóðirnir sjái hag í því að standa að stórfelldum erlendum fjárfestingum, ekki hvað síst með hliðsjón af því að nafngengi krónunnar gagnvart evru hefur ekki verið lægra frá árinu 2013.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.