Að minnsta kosti fimmtíu meint kynferðisbrot Þorsteins fara fyrir dóm

Þorsteinn Halldórsson, dæmdur kynferðisbrotamaður, þarf að svara til saka í kynferðisbrotamáli héraðssaksóknara gegn honum. Þetta er niðurstaða Landsréttar sem felldi úr gildi frávísun í héraði á alvarlegasta ákæruliðnum á hendur Þorsteini þar sem hann er sakaður um fimmtíu kynferðisbrot gegn dreng sem var á aldrinum fjórtán til sautján ára.

Landsréttur skikkar héraðsdóm til að taka málið fyrir.

Þorsteinn var ákærður fyrir að hafa frá árinu 2015 fram til 21. september 2017 margítrekað eða að lágmarki í fimmtíu skipti haft kynferðismök við drenginn á ýmsum stöðum á höfuðborgarsvæðinu, í nágrenni þess og nýtt sér yfirburði vegna aldurs-, þroska- og reynslumunar.

Var hann sakaður um að hafa gefið drengnum peninga og fleiri vörur og beitt hann þrýstingi og yfirgangi til að hitta hann og fá vilja sínum fram. Þá hafi hann virt að vettugi svör drengsins um að geta eða vilja ekki hitta Þorstein. Mætti hann óvænt á staði þar sem drengurinn var staddur og krafði drenginn um endurgreiðslu peninga og gjafa þegar hann reyndi að slíta samskiptum við Þorstein, eins og segir í ákæru.

Þorsteinn var sömuleiðis ákærður fyrir að hafa tekið ljósmyndir af drengnum sem sýndu hann á kynferðislegan og klámfengan hátt. Er honum gefið að sök að hafa sent myndir af honum til óþekktra aðila. Lögregla haldlagði símann og er hann á meðal sönnunargagna í málinu.

Sögðu Þorstein ekki geta varist ákærunni

Guðmundur St. Ragnarsson, verjandi Þorsteins, krafðist þess fyrir héraðsdómi að ákærunni yrði vísað frá dómi.

Ástæðan væri sú að ómögulegt væri að verjast ákærunni þar sem ekkert væri tekið fram um nákvæmar tímasetningar, staði og nánar atvikalýsingar sem gerðu Þorsteini erfitt að verja sig fyrir dómi. Sömuleiðis væri erfitt fyrir héraðsdóm að taka afstöðu til málsins.

Þessu var héraðsdómur samþykkur og vísaði fyrri ákæruliðnum frá í janúar. Kom fram í niðurstöðunni að framsetning sakargifta í ákæruliðnum samrýmdist ekki lögum um meðferð sakamála.

Héraðssaksóknari kærði niðurstöðuna til Landsréttar sem kvað upp dóm í dag. Telur Landsréttur sakargiftum lýst með nægilega greinargóðum hætti til þess að héraðsdómur geti tekið ákæruna til meðferðar.

Hvorki héraðsdómur né Landsréttur féllust á að ákæruliðnum sem sneri að myndatökunum og sendingu þeirra yrði vísað frá dómi.

Þorsteinn afplánar nú fimm og hálfs árs fangelsisdóm fyrir kynferðisbrot gegn öðrum dreng.