Viðskipti erlent

WorldCom-forstjórinn látinn

Kjartan Kjartansson skrifar
Bernard Ebbers við dómshús á Manhattan árið 2006. Hann var fundinn sekur um skuldabréfasvik og fleiri brot.
Bernard Ebbers við dómshús á Manhattan árið 2006. Hann var fundinn sekur um skuldabréfasvik og fleiri brot. AP/Louis Lanzano

Bernard Ebbers, fyrrum forstjóri bandaríska fjarskiptafyrirtækisins Worldcom sem hlaut fangelsisdóm í stærsta bókhaldssvikamáli landsins, er látinn, 78 ára að aldri. Aðeins er um mánuður liðinn frá því að Ebbers var sleppt úr fangelsi.

WorldCom fór í þrot árið 2002 í kjölfar uppljóstrana stórfelld bókhaldssvik upp á um ellefu milljarða dollara. Æðstu stjórnendur fyrirtækisins höfðu þá þrýst á undirmenn sína að hagræða bókhaldinu til að láta það líta út fyrir að vera arðbærara en það raunverulega var. Við hrun WorldCom töpuðu lífeyrissjóðir meðal annars háum fjárhæðum.

Fjölskylda Ebbers tilkynnti um andlát hans í gær. Hann var látinn laus úr fangelsi áður en hann hafði lokið afplánun vegna hrakandi heilsu í desember, að sögn AP-fréttastofunnar. Lögmaður Ebbers sagði þá að ekki væri víst að hann ætti eftir að lifa nógu lengi til að hann næði að afplána dóm sinn.

Ebbers var sakfelldur fyrir verðbréfasvik og fleiri brot árið 2005. Hann hlaut 25 ára fangelsisdóm og hóf afplánun í september árið 2006.


Tengdar fréttir

Forstjóri WorldCom dæmdur

Bernard Ebbert, fyrrum forstjóri WorldCom, var í gær dæmdur í 25 ára fangelsi fyrir svæsin fjársvik og samsæri,sem leiddi fyrirtækið í stærsta gjaldþrot í sögu Bandaríkjanna. Hluthafar í WorldCom töpuðu um 12 þúsund milljörðum íslenskra króna og 20 þúsund starfsmenn fyrirtækisins misstu vinnuna.

Fyrrum forstjóri WorldCom í fangelsi

Bernard Ebbers, fyrrum forstjóri bandaríska fjarskiptafélagsins WorldCom, fer í fangelsi í dag. Hann var dæmdur í 25 ára fangelsi fyrir fjársvik, bókhalds- og skjalafals í mars á síðasta ári en hefur margsinnis áfrýjað dóminum. Verði Ebbers allan tímann í fangelsi fær hann lausn árið 2028.






Fleiri fréttir

Sjá meira


×