Fasteignasölur sameinast

Fasteignasölurnar Landmark og Kaupsýslan hafa sameinast undir heitinu Landmark/ Kaupsýslan fasteignamiðlun. Monika Hjálmtýsdóttir og Júlíus Jóhannesson eru nýir meðeigendur í sameinuðu félagi. Aðrir eigendur eru Andri Sigurðsson, Sigurður Samúelsson, Sveinn Eyland Garðarsson og Þórey Ólafsdóttir .

Landmark, sem hóf starfsemi árið 2010, sameinaðist Smáranum fasteignamiðlun árið 2017 sem stofnað var árinu áður. Kaupsýslan tók til starfa árið 2012. Í sameinuðu félagi Kaupsýslunnar og Landmarks munu starfa 16 starfsmenn, að því er fram kemur í tilkynningu frá aðstandendum félagsins. Allir fasteignasalar þess eru jafnframt sagðir meðlimir í Félagi fasteignasala.

Haft er eftir fyrrnefndri Moniku í tilkynningunni að með sameiningunni sé vonast eftir mikilvægum samlegðaráhrifum, sem ætlað er að bæta þjónustu sameinaðs félags við viðskiptavini.