Töluverð fækkun ferðamanna en samt gott ár

Tæplega tvær milljónir erlendra farþegar fóru frá landinu um Keflavíkurflugvöll á síðasta ári. Alls var fækkun um 329 þúsund farþegar frá árinu 2018, samkvæmt talningu Ferðamálastofu og Isavia. Fækkun þessi nemur 14,2 prósentum. Þrátt fyrir þessa fækkun er um að ræða þriðja fjölmennasta ferðamannaárið frá upphafi talninga.

Samkvæmt tilkynningu frá Ferðamálastofu er þetta í fyrsta sinn á níu ára tímabili sem fækkun er á þessari tölu.

Bandaríkjamenn voru fjölmennastir þeirra sem sóttu Ísland heim á árinu eða um 464 þúsund talsins. Þrátt fyrir það fækkaði þeim um 230 þúsund á milli ára. Bretar mældust tæplega 262 þúsund en þeim fækkaði um 12 prósent. Þjóðverjar eru í þriðja sæti, alls um 132 þúsund, og fækkaði þeim um fimm prósent.

Um 99 þúsund Kínverjar komu til Íslands á árinu og fjölgaði þeim um tíu prósent. Frakkar voru um 97 þúsund, sem er svipað og 2018 og þar á eftir Pólverjar (94 þúsund), Kanadamenn (67 þúsund), Spánverjar (59 þúsund), Danir (49 þúsund) og Ítalir (47 þúsund)

Langflestir skiptifarþegar eru ekki inn í þessum tölum.