Atvinnulíf

Betra að vinna ekki þegar að við eigum að vera í fríi

Rakel Sveinsdóttir skrifar
Að vinna á kvöldin og um helgar getur haft neikvæð áhrif á viðhorfið okkar til starfsins eða vinnustaðarins.
Að vinna á kvöldin og um helgar getur haft neikvæð áhrif á viðhorfið okkar til starfsins eða vinnustaðarins. Vísir/Getty

Það hvenær og hvernig við vinnum er að breytast nokkuð hratt í kjölfar kórónufaraldurs þar sem margir vinna nú að heiman að öllu leyti eða að hluta. Þá boðar þríeykið þau tíðindi að mögulega megi búast við að reglur verði hertar eða á þeim slakað um nokkurn tíma til viðbótar sem aftur þýðir að vinnustaðir gera ráð fyrir mismunandi sviðsmyndum innandyra hjá sér.

Að vinna í fjarvinnu getur aukið sveigjanleikann í vinnu en í umfjöllun Harvard Business Review er brýnt fyrir fólki að í fjarvinnu þurfi líka að passa vel upp á það að frítími sé virtur. Ekki aðeins hefur fjöldi rannsókna sýnt að það er allra hagur að fólk nái góðri hvíld frá vinnu heldur hafa rannsóknir einnig sýnt fram á að vinna utan hefðbundins vinnutíma getur haft huglæg áhrif á það hvernig við upplifum starfið okkar eða vinnustað.

Þessu til rökstuðnings er sagt frá rannsókn sem gerð var í Bandaríkjunum þar sem svarendur voru 1.298 starfsmenn í fullu starfi. Sá hópur fólks sem sagðist ekki vinna um helgar var almennt jákvæðara gagnvart vinnunni sinni, þ.e. hvatinn (e.motivation) var meiri og fólk var líklegra til að segja vinnuna sína skipta það miklu máli og að þar fengi fólk að nýt styrkleika sína vel.

Þá var sagt frá könnun sem gerð var meðal nemenda í Harvard. Þar var hluti nemenda minntur á að þann dag sem könnunin var framkvæmd, 17.febrúar, væri bandaríski frídagurinn President‘s Day eða Dagur forseta. Hluti hópsins fékk hins vegar eingöngu upplýsingar um að dagsetningin væri 17.febrúar. Niðurstöður úr þessari könnun sýndu að sá hópur nemenda sem var minntur á það sérstaklega að þennan dag væri frídagur, lýsti náminu sínu almennt meira íþyngjandi en sá hópur sem var ekki minntur á þennan hátíðisdag.

En hvað er til ráða ef vinnan kallar um helgar?

Það ráð er gefið að ef fólk þarf að vinna eitthvað um helgi, þá stilli það hugann fyrirfram inn á það að þessi X-tími sem fer í vinnuna skilgreinist sem vinnutími en ekki tími þar sem þú átt að vera í fríi. Með þessari einföldu hugarleikfimi platar þú heilann sem aftur dregur úr líkum á því að fólk ómeðvitað er ekki eins jákvætt gagnvart starfi sínu eða vinnustað.


Tengdar fréttir

Úrvinda starfsmenn: Vísbendingar um að fólk eigi erfiðara með að höndla vinnuálag

Þótt fólk haldi að álag sé að aukast á vinnustöðum sýna mælingar á milli ára að fólk er ekki að meta álag í vinnunni meira en áður. Mun fleiri segjast þó vera úrvinda eftir vinnu og mjög þreyttir. Tómas Bjarnason sviðsstjóri mannauðsrannsókna og ráðgjafar hjá Gallup segir áreiti á fólk og tíðar breytingar nefndar til skýringar.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×