Bílar

Vali á bíl ársins seinkað fram á vor

Kristinn Ásgeir Gylfason skrifar
Jaguar I-Pace hlaut nafnbótina bíll ársins 2020.
Jaguar I-Pace hlaut nafnbótina bíll ársins 2020. BÍBB/HAG

Stjórn Bandalags íslenskra bílablaðamanna (BÍBB) hefur í ljósi aðstæðna tekið þá ákvörðun að gera breytingar á tilhögun varðandi val á bíl ársins á Íslandi. Valið verður fært til vormánaða, eins og áður var venja.

Undanfarin ár hefur valið farið fram á haustmánuðum hvert ár. Áður en það varð venja var valið á vormánuðum og því er hverið að hverfa aftur til fortíðar með nýrri tímasetningu. Tilkynnt verður um val á bíl ársins í maí hér eftir.

„Framleiðendur kynna jafnan nýjar gerðir á haustmánuðum sem koma oft á markað í október og nóvember. Af því leiðir að fjölmargar nýjar gerðir hafa ekki komist inn í forval né lokaval á Bíl ársins á Íslandi. Með því að færa lokavalið til frambúðar til vors telur stjórn BÍBB að valið endurspegli betur það úrval nýrra bíla sem í boði eru á Íslandi hverju sinni,“ segir í frétt á vef BÍBB um málið. 

Þá segir enn frekar að þrátt fyrir breytinguna geti umboðsaðilar tilnefnt bíla sem nú þegar eru komnir til landsins og ljóst er að verði komnir fyrir mánaðamótin mars/apríl ár hvert.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.