Veiði hófst í nokkrum ám í morgun og þar á meðal Ytri Rangá en nokkur spenna hefur verið með opnun hennar eftir að góðar veiðitölur úr systuránni.

"Það er alla vega einn lax kominn á land í Rangárflúðum veit ég en ég er ekki búinn að heyra í hinum stöngunum" sagði Bjarki Már Jóhannsson yfirleiðsögumaður í Ytri Rangá þegar við náðum honum uppteknum við bakkann. "Ég er við Djúpós núna og það eru einhverjir átta laxar sem ég sé hérna núna en svo sáum við nokkra laxa líka við Ægissíðufoss svo þetta lítur ágætlega út, veðrið mætti vera betra" bætti Bjarki við.

Það er nokkuð síðan fyrstu laxarnir sáust í Ytri Rangá og eftir því sem reynsluboltarnir segja er hann nokkuð fljótur upp að þeim veiðistöðum sem liggja við sleppitjarnirnar sem seiðin koma úr. Staðir eins og Hellisey, Rangárflúðir, Djúpós, Stallmýrarfljót og Hrafnaklettar eru líklega þeir staðir sem mest verður reynt á í dag en þar sem þetta eru mjög vanir menn sem eru að opna ánna má kannski reikna með að allir hyljir og breiður fái í það minnsta eitt rennsli með flugunni. Við bíðum spennt eftir tölum dagsins.