Fótbolti

Játar að hafa haft sam­band við Heimi og segist hafa þurft að gera breytingar á þjálfara­t­eyminu í ár

Anton Ingi Leifsson skrifar
Rúnar Páll Sigmundsson
Rúnar Páll Sigmundsson vísir/bára

Rúnar Páll Sigmundsson, þjálfari Stjörnunnar, viðurkennir að hann hafi haft samband við Heimi Guðjónsson eftir að hann fékk ekki áframhaldandi samning hjá FH eftir tímabilið 2017.

Rúnar Páll var gestur Hjörvars Hafliðasonar í spjalli í hlaðvarpsþættinum Dr. Football en þeir ræddu meðal annars þjálfarateymi Rúnars.

Hann segist hafa verið með sterka persónuleika í þjálfarateyminu sínu undanfarin ár og ekki minnkaði það í haust þegar tilkynnt var að margfaldi Íslandsmeistarinn Ólafur Jóhannesson væri kominn í teymið með Rúnari Páli.

„Það má ekki gleyma því að ég hef verið með mjög góða aðstoðarmenn og þjálfara í mínu teymi. Brynjar Björn kemur inn, hokinn af reynslu úr atvinnumennsku og þó að hann hefur ekki þjálfarareynslu þá kemur hann sterkur inn og er sterkur karakter. Brynjar er með mér í fjögur ár,“ sagði Rúnar og hélt áfram að fara í gegnum þjálfarateymið sitt í gegnum árin.

„Hverju bætum við þá? Fjalar kemur inn í stað Bödker og við fáum Davíð Snorra inn sem „analyzer“ í tvö ár. Hann kemur inn í þjálfarateymið með einstaklingsæfingar og er hrikalega fær þjálfari. Síðan fáum við inn þriðja aðstoðarþjálfarann í Jóni Þóri. Hafsjóður af fróðleik, góður taktískur, leiðtogi og góður þjálfari. Við höfum alltaf verið með gott teymi,“ en Davíð Snorri og Jón Þór fengu svo starf hjá KSÍ eftir störf sín hjá Stjörnunni. Því þurfti Rúnar að mynda nýtt teymi fyrir tímabilið í fyrra.

„Við tókum þann pól í hæðina að horfa inn á við og vorum með Fjalar (Þorgeirsson), Andra (Hafsteinsson) og Veigar (Pál Gunnarsson) í teyminu í fyrra. Það gekk ágætlega en ég ákvað að gera breytingar. Mér fannst þetta ekki fúnkera nógu vel og þá ferðu að velta fyrir þér hverjir eru þarna úti.“

Guðmundur Benediktsson fullyrti í þættinum Sportinu í kvöld að Rúnar Páll hafi reynt að fá Heimi þegar samningur hans var ekki endurnýjaður hjá FH. Rúnar staðfestir þetta.

„Þegar við réðum Jón Þór var Heimir Guðjónsson atvinnulaus. FH réð hann ekki aftur og hann er utan starfs. Einn færasti þjálfari á Íslandi. Ég sagði afhverju fáum við ekki Heimi til okkar og bjóðum honum starf í okkar þjálfarateymi? Það er ekkert að því. Þá fær hann bara atvinnu hérna. Við getum alltaf nýtt okkur svona góða menn. Við töluðum við hann og hann var spenntur fyrir því en fékk svo tilboð frá Færeyjum og ákvað að slá á það frekar.“

„Síðan lendi ég aftur í þessari stöðu núna þegar við breytum alveg um þjálfarateymi og fáum inn Rajko sem markmannsþjálfara sem er algjör snillingur. Við vorum búnir að ráða hann og svo er maður að hugsa hverjir eru þarna úti? Einhverjir ungir strákar sem vilja koma og sanna sig og fá reynsluna en þarf ég á því að halda? Þarf mannskapurinn á því að halda? Nei, við vorum með þannig í fyrra.“

„Þá dettur mér Óli Jó í hug. Við erum með hrikalega öflugan þjálfara sem er ekki að gera neitt. Hann ætlaði bara taka sér frí en ég hringi í hann og spjalla við hann og hvort að hann væri tilbúinn að koma inn í teymið. Hann ætlaði að hugsa þetta og fimm mínútum seinna var hann klár og við hittumst. Við fórum yfir þetta og hvernig við ætluðum að hafa þetta og hvað ég væri að hugsa. Hann gaf sér einn sólahring í þetta og var klár í slaginn.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.