Raftækjaframleiðandinn Sony smíðaði sjálfkeyrandi rafbíl

Sony, sem framleiðir alla jafna raftæki, myndavélar og Playstation leikjatölvur hefur smíðað bíl. Bíllinn heitir Vision-S og er á hugmyndastigi.

Sony segir að bíllinn „sýni hvað framleiðandinn ætlar að leggja til samfélags háþróaðra sjálfkeyrandi bíla“. Bíllinn er því augljóslega sjálfkeyrandi og svo er hann rafdrifinn.

Hér má sjá gamalt Top Gear innslag þar sem búið var að koma Sony Playstation fyrir í bíl.

Bíllinn var kynntur á CES (raftækjasýningunni í Las Vegas), þar sem hann ók sjálfur upp á svið, svo það er að minnsta kosti einhverskonar aflgjafi um borð. Ekki er þó meira vitað um aflgjafann en það að hann er til staðar.

Aðaláherslan í kynningu Sony voru skynjarar bílsins. Þeir eru 33 talsins, svokallaðir CMOS (complementary metal oxide semiconductor) skynjarar sem skynja hluti allt í kringum bílinn. Það eru sömu skynjarar og búa til myndir í stafrænum myndavélum. Þar að auki notar Vision-S, LiDAR búnað til að smíða þrívíddar kort af umhverfi sínu með leiser geislum og „Time of Flight“ skynjara til að skynja fólk inn í bílnum.

Innrarýmið er afar vandað að sjá með góðum hljómflutningsgræjum, sem er jú það sem Sony er þekkt fyrir að framleiða. Stóra spurningin er hvort þessi bíll fari í framleiðslu. Henni er ósvarað.