Ofát í fjarvinnu

Ef það er eitthvað sem virðist breiðast út hraðar en kórónufaraldurinn sjálfur þá er það óttinn við ofát í fjarvinnu, heimaviðveru eða sóttkví. Að minnsta kosti ef marka má samfélagsmiðla þar sem vinir gantast með myndum og bröndurum sem endurspegla ástandið í mataræðinu eða í hvað stefnir.

Hér eru fimm atriði til að sporna við ofáti í fjarvinnu.

1. Ákveddu klukkan hvað þú mátt borða

Búðu þér til tímaáætlun sem er í takt við það sem þú þekkir úr vinnuumhverfinu. Þessi tímaáætlun, eða stundartafla máltíða, getur hjálpað þér að borða minna, vera betur vakandi yfir því hvað þú ert að borða, jafna blóðsykurinn og passa að þú standir ekki upp og grípir þér bara einhverja óhollustu vegna þess að hungrið er farið að segja of mikið til sín.

Hér er talað um þrjár máltíðir og eitt millimál þar sem ekki líður lengur á milli en fimm klukkutímar. Dæmi um slíka áætlun gæti verið klukkan 8, klukkan 12, klukkan 16 og klukkan 19.

2. Vertu vakandi yfir því hvað þú borðar og veldu vel

Ofát skýrist oft að því að það er verið að borða of mikið af óhollustu sem þýðir að svengdin er fljót að láta vita af sér aftur. Hvað gerir þig saddan/sadda? Er það kornflexskálin eða góður boostdrykkur að morgni? Eða er hafragrauturinn málið?

Að sjálfsögðu má benda á prótein, trefjar, grænmeti og ávexti en hér er aðallega minnt á að velja vel og passa að það sem þú borðar sé saðsamt og dugi fram að næstu máltíð.

3. Endurskoðaðu hvað þú drekkur

Að forðast sykraða drykki er aðalmálið og hér er bent á að vera með vatnsbrúsa við hendina þannig að þú sért að drekka vatn jafnt og þétt yfir daginn. Þá þarf að neyta áfengis í hófi á kvöldin.

4. Gerðu greinamun á líkamlegri svengd og huglægri svengd

Fyrir marga er þetta erfiðasta áskorunin því löngunin í mat er oft mun meir en líkaminn er að kalla á. Huglæga svengdin er sú sem fær okkur til að freistast og þess vegna er ágætis regla að spyrja sjálfan sig í hvert sinn: Eru garnirnar aðeins farnar að gaula? Er svengdin í raun til staðar?

Eins þarf að huga að skammtastærðinni þegar þú ert að borða þannig að þú borðir ekki of mikið. Besta ráðið er að gera ekkert annað á meðan þú ert að borða, borða hægt og vera vakandi yfir því þegar líkaminn er að segja þér að hann sé búinn að fá nóg. Sumsé: Ekkert sjónvarp, tölva eða sími á meðan þú borðar.

5. Leyfðu þér eitthvað

Að forðast ofát í fjarvinnu er ekki það sama og megrun eða eitthvað allsherjar átak. Markmiðið er að koma reglu á mataræðið, borða hollara og minna en ekki að hætta öllu eða skipta því út fyrir grænmeti og aðra hollustu.

Leyfðu þér frekar eitthvað smá. Ef þér finnst til dæmis gott að fá þér eina til tvær kexkökur eftir hádegismatinn, leyfðu þér það þá en haltu þig að öðru leyti við áætlunina þína. Aðalmálið er að kexpakkinn hverfi ekki ofan í þig síðdegis til viðbótar við allt annað sem þér mögulega tókst að finna í eldhússkápunum.