Gera ekki ráð fyrir 737 MAX flugvélunum í sumar

Forsvarsmenn Icelandair gera ekki ráð fyrir því að geta notað Boeing Max flugvélar félagsins næsta sumar. Það sé í ljósi nýrra frétta frá Boeing og af því ferli sem stendur nú yfir í samvinnu við alþjóða flugmálayfirvöld við að tryggja öryggi Boeing-737 MAX flugvélanna. Icelandair Group stefnir þar að auki að því að fá allt tjón vegna kyrrsetningar flugvélanna bætt.

Í tilkynningu frá Icelandair segir að áhrif á flugáætlun félagsins verði óveruleg.

Það ku vera vegna ráðstafana sem félagið hefur þegar gripið til. Búið var að setja upp flugáætlun félagsins með það að leiðarljósi að takmarka áhrif frekari tafa á afléttingu kyrrsetningar flugvélanna. Þá hafi þrjár Boeing 737-800 flugvélar verið leigðar og ákveðnum fjölda Boeing 757 flugvéla verður haldið lengur í flota félagsins en áður hafði verið gert ráð fyrir.

„Ljóst er að fjárhagsleg áhrif áframhaldandi kyrrsetningar verða mun minni á árinu 2020 en þau voru árið 2019. Skýrist það af ofangreindum þáttum auk þess sem gengið hefur verið frá leigu viðbótar véla með meiri fyrirvara nú en árið 2019 og leigukjör því mun hagstæðari. Áhafnir Icelandair munu jafnframt fljúga leiguvélunum en ekki áhafnir leiguflugfélaga sem leigðar voru inn með skömmum fyrirvara árið 2019. Félagið hefur þannig haft tækifæri til að skipuleggja rekstur sinn með þessa sviðsmynd í huga,“ segir í tilkynningunni.

Þar segir einnig að áhersla Icelandair á þessu ári verði ferðamannamarkaðinn til Íslands, eins og síðasta ár. Gert er ráð fyrir því að Icelandair flytja í það minnst jafnmarga farþega til Íslands á þessu ári og gert var á því síðasta.

Icelandair og Boeing hafa tvisvar sinnum gert bráðabirgðasamkomulag um skaðabætur vegna kyrrsetningarinnar og standa nú yfir viðræður um frekari bætur.