Verð á fiski hækkar um 4 til 10 prósent á milli ára

Algengt er að verð á fiskafurðum hafi hækkað um 4 til 10 prósent á síðasta ári, samkvæmt verðlagseftirliti ASÍ.

Eftirlitið kannaði verð þann 20. maí síðastliðinn, en sambærileg könnun var gerð þann 2. júní á síðasta ári. Segir að til hliðsjónar megi benda á að verð á fiski hafi hækkað um átta prósent í vísitölu neysluverðs á þessu tímabili.

„Af þeim 15 fiskafurðum sem bornar eru saman kemur í ljós að verð hækkaði mest um 10% að meðaltali á plokkfiski, meðalverðið var í júní 2014 1.523 kr./kg. en er nú 1.671 kr./kg. Einnig má nefna að ýsuhakk hefur hækkað að meðaltali um 9%,  meðalverðið í fyrra var 1.432 kr./kg. en er nú 1.559 kr./kg.

Minnsta hækkunin er á rauðsprettuflökum sem hafa aðeins hækkað um 1% á milli mælinga, eða úr 1.708 kr./kg. í 1.730 kr./kg.

Af einstökum verslunum í samanburðinum má nefna að oftast er sama verð og í fyrra hjá Fiskbúðinni Hafrúnu eða í 7 af 9 tilvikum, hjá Ship O Hoj í 6 af 8 tilvikum og hjá Fiskbúðinni Sundlaugavegi í 6 af 12 tilvikum.

Verslanirnar Fisk kompaní, Fiskbúðin Fiskás, Fiskbúðin Hófgerði og Hagkaup hækkuðu meira en aðrar verslanir eða um og vel yfir 10.

Þær verðbreytingar sem hér eru birtar miðast við breytingar á verði verslana milli verðkannana verðlagseftirlits ASÍ frá 2.6.2014 og 20.5.2015. Rétt er að árétta að mæld eru þau verð sem eru í gildi á hverjum tíma í versluninni og geta tilboðsverð haft áhrif á verðbreytingar einstakra vara.“

Nánar er fjallað um könnunina á heimasíðu ASÍ.

Samanburðurinn nær til eftirtalinna verslana: Fiskbúðinni Sundlaugavegi, Þinni verslun Seljabraut, Fisk kompaní Akureyri, Fiskbúðinni Hafrúnu Skipholti, Fiskbúðinni Fiskás Hellu, Samkaupum Úrval Hafnarfirði, Nettó Granda, Fjarðarkaupum Hafnarfirði, Fiskbúðinni Trönuhrauni, Ship O Hoj Reykjanesbæ, Litlu Fiskbúðinni Miðvangi, Hafinu fiskverslun Hlíðasmára, Nóatúni Háaleitisbraut, Fiskbúð Hólmgeirs Þönglabakka, Gallerý fisk Nethyl, Fiskbúðinni Hófgerði, Fiskbúð Sjávarfangs Ísafirði, Fiskbúðinni Mos Mosfellsbæ, Fiskbúð Siglufjarðar og Hagkaupum Kringlunni. Segir að hér sé aðeins um beinan verðsamanburð að ræða en ekki lagt mat á gæði eða þjónustu söluaðila.