Sumarið búið hjá Steðja

„Reglugerðir ÁTVR eru bara að þvælast fyrir okkur, eins og vanalega,“ segir Dagbjartur Ingvar Arilíusson eigandi Steðja en sumarbjór fyrirtækisins hættir í sölu eftir helgina – þrátt fyrir að enn sé hásumar.

Samkvæmt reglugerð frá árinu 2011 mega árstíðarbundnir áfengisdrykkir, eins og sumarbjórinn, einungis vera í sölu í einn til þrjá mánuði ár hvert en drykkur Steðja kom á markað þann 10. maí síðastliðinn. Á sunnudaginn næstkomandi verða liðnir þrír mánuðir frá því að sumarbjórinn rataði fyrst í hillur Vínbúðarinnar og verður honum því kippt úr sölu eftir helgi. Sumrinu hjá Steða lýkur því á sunnudag.

Samkvæmt birgðaskrá ÁTVR í dag, 7. ágúst, kemur fram að á lager í vínbúðum landsins eru 2.398 flöskur af Sumarbjór frá Steðja, eða nákvæmlega 800 lítrar. Verði þessar flöskur ekki seldar fyrir næsta sunnudag verður Steðji Brugghús að sækja flöskurnar og annað hvort að farga innihaldinu eða selja flöskurnar til veitingahúsa ef marka má útreikninga Skessuhorns.

Framleiðslan á jólabjórnum fer að hefjast og ekkert pláss verður því á lagernum til að geyma úreltan sumarbjór.

Brugghúsið þakkar viðskiptavinum sínum fyrir frábærar móttökur á sumarbjórnum í Facebook-færslu um leið og þeir biðjast afsökunar á mistúlkun þeirra á reglufargani áfengisverslunarinnar.

„[V]ið töldum að eftir langan og dimman vetur þá hæfist sumarið á sumardaginn fyrsta og að við fengjum að njóta sumarsins a.m.k. út ágústmánuð“.

Post by Brugghús Steðja.