FME: Skipun Brynju er enn til skoðunnar

Fjármálaeftirlitið (FME) segir að skipun Brynju Halldórsdóttur í stjórn Lífeyrissjóðs verslunnarmanna sé enn til skoðunnar. Það sé því rangt sem haldið var fram af Margréti Kristmannsdóttur að FME hefði ekkert við skipunina að athuga.

Á vefsíðu FME segir að í kvöldfréttatíma Sjónvarpsins hinn 8. september síðastliðinn var talað við Margréti Kristmannsdóttur, formann Samtaka verslunar og þjónustu, sem sagði að Fjármálaeftirlitið hefði ekkert að athuga við setu fyrrverandi stjórnarmanns í Kaupþingi í stjórn Lífeyrissjóðs verslunarmanna.

„Fjármálaeftirlitið vill gera athugasemd við þessi orð. Skipun stjórnarmannsins er til skoðunar hjá Fjármálaeftirlitinu og hefur eftirlitið því ekki lokið athugun sinni á því hvort viðkomandi stjórnarmaður er hæfur til að sitja í stjórn lífeyrissjóðsins þar sem einungis eru rúmar tvær vikur síðan fullnægjandi gögn um stjórnarmanninn bárust eftirlitinu," segir á vefsíðunni.