Önnur vítamínsprauta í hagkerfi BNA

Demókratar á Bandaríkjaþingi hyggja á frekari aðgerðir til að örva bandarískt efnahagslíf. Nancy Pelosi, forseti Bandaríkjaþings, sagðist vona að þingið gæti afgreitt lög um 50 milljarða dollara efnahagsörvun fyrir kosningar í haust. Fyrr í ár samþykkti þingið 152 milljarða dollara efnahagsörvun, mest í formi skattaendurgreiðslna til einstaklinga og fyrirtækja.

Demókratar hafa síðan þá rætt möguleikann á öðrum efnahagsörvunarpakka, en til að ná þverpólitískri sátt voru mörg málefni sem flokksmönnum voru hugleikin skorin úr lögunum.

Barack Obama, forsetaframbjóðandi Demokrataflokksins, lýsti því yfir á fundi verkalýðssamtakanna United Autoworkers í Detroit að hann myndi styðja lög um sértækar aðgerðir til stuðnings efnahagslífinu, að því tilskyldu að í honum yrðu ákvæði um aðstoð við bílaframleiðendur, og stuðningur við þróun og framleiðslu umhverifsvænni bíla.

Ólíklegt er talið að repúblikanar muni styðja annan örvunarpakka. George W. Bush hefur lýst sig andvígan frekari aðgerðum meðan beðið sé hvort fyrri örvunarpakki nægi til að rétta við ástandið. John Boehner, leiðtogi repúblikana í neðri deild Bandaríkjaþings tók í sama streng og sagði að bandarískt hagkerfi væri „merkilega sterkt“. - msh