Slæmar efnahagshorfur í Bandaríkjunum

Ben Bernanke, seðlabankastjóri Bandaríkjanna, sagði í dag útlit fyrir slæmar efnahagshorfur í Bandaríkjunum og muni seðlabankinn vera reiðubúinn til að lækka stýrivexti frekar til að bregðast við ástandinu til að sporna við því.

Bernanke, sem ræddi við efnahagsnefnd bandarísku öldungadeildarinnar, í dag um horfur í efnahagsmálum og stefnu seðlabankans, vísaði hann til þess þrengingar á bandarískum fasteignamarkaði og lækkun íbúðaverðs hafi dregið mjög úr krafti efnahagslífsins. Mjög hafi dregið úr nýráðningum fyrirtækja og sé útlit fyrir að einstaklingar muni draga úr einkaneyslu á næstunni.

„Efnahagshorfur hafa versnað mikið upp á síðkastið," sagði Bernanke og bætti við að þótt aðgerðir seðlabankans og bandarískra stjórnvalda í þá átt að gera fasteignaeigendum auðveldara um vik að greiða af lánum sínum þá hafi gjaldþrotum fjölgað sem upptöku eigna vegna vanskila.

Hann sagðist ennfremur reikna með að efnahagshorfurnar muni batna síðar á árinu. Eftir sem áður væri mikilvægt að gera sér grein fyrir hættumerkjunum.

Seðlabanki Bandaríkjanna hefur lækkað stýrivexti um 1,25 prósent á þessu ári einu saman í því skyni að koma í veg fyrir samdrátt í einkaneyslu sem spáð er að geti komið harkalega niður á hagvexti auk þess að veita háum fjárhæðum inn í efnahagslífið.