Steinunn: Glitnismálið rekið hér heima

„Dómarinn komst að þessari niðurstöðu. Hann taldi að málið ætti heima á Íslandi en hann setti hins vegar tvö skilyrði sem stefndu verða að uppfylla," segir Steinunn Guðbjartsdóttir, formaður slitastjórnar Glitnis. Hæstiréttur í New York vísaði í dag frá stefnu slitastjórnarinnar gegn sjömenningum sem stefnt hafði verið vegna ásakana um að hafa með sviksamlegum og ólöglegum hætti haft fé af bankanum.

Skilyrðin eru af tvennum toga segir Steinunn. „Í fyrsta lagi að þeir myndu ekki mótmæla lögsögu íslenskra dómstóla. Því einhverjir af þessum aðilum eru jú búsettir utan Íslands," segir Steinunn. Í öðru lagi að sjömenningarnir myndu ekki mótmæla fullnustu íslensks dóms yfir eignum erlendis. „Það eru skilyrðin fyrir því að málið fari ekki áfram hér að þeir gangist undir þetta," segir Steinunn.

Steinunn segir niðurstöðuna í New York vissulega vera vonbrigði, en hana verði að virða. „Þessu máli er náttúrlega langt því frá að vera lokið," segir Steinunn. Hún býst við því að málið verði rekið hér heima og að hægt sé að stíga næstu skref áður en langt er um liðið. Hún segir að sú vinna sem þegar hafi farið fram muni nýtast. Máli sínu til stuðnings segir hún að lögmennirnir sem hafi unnið fyrir slitastjórnina ytra hafi verið í samstarfi við íslenska lögmenn.