Norðmenn að drukkna í olíupeningum

Talan 220.000 milljarðar króna er sennilega ofvaxin skilningi flestra. Þetta er sú upphæð sem olíusjóður Norðmanna mun standa í árið 2030 ef svo heldur sem horfir með þróun heimsmarkaðsverðs á olíu.

Norðmenn eru þegar orðnir stórefnuð þjóð á olíuvinnslu sinni og á viðskiptavefnum E24 kemur m.a. fram að í ár er reiknað með að rúmlega 100 milljarðar króna muni fara úr olíusjóð þjóðarinnar og yfir á fjárlög en sú upphæð er tekin af ávöxtun sjóðsins og hreyfir ekki við innlegginu sjálfu.

Inneign hvers Norðmanns í olíusjóðnum árið 2030 mun nema tæplega 50 milljónum kr. miðað við að fólksfjöldinn þróist áfram með sama hætti og verið hefur og að þjóðin telji 4,7 milljónir manna þetta ár.