Starfsfólk Landsbankans fær 13. mánuðinn í jólagjöf

Landsbankinn er eini bankinn sem innir sérstaka auka launagreiðslu af hendi í desember, en hann greiðir öllum starfsmönnum viðbótarmánuð á meðan aðrir láta jólagjafir nægja.

Stóru bankarnir færa starfsfólki sínu allir glaðning þessi jólin að sögn upplýsingafulltrúa þeirra, þó þeir séu misumfangsmiklir.

Hjá Arion banka verður enginn viðbótarjólabónus greiddur út, en starfsmenn fá matarkassa að gjöf með ýmislegu góðgæti að verðmæti um tíu til fimmtán þúsund krónur auk Arion banka gjafakorts með þrjátíu þúsund króna inneign.

Íslandsbanki greiðir heldur engin sérstök viðbótarlaun, en upplýsingafulltrúi bankans segir að þrátt fyrir að bankinn leggi áherslu á góð starfskjör hafi útgreiðsla jólabónusa ekki þótt fara saman við hagræðingaraðgerðir sem bankinn hefur ráðist í vegna sameiningar hans við Byr. Hins vegar kemur starfsfólk til með að fá jólagjöf, sem mun ekki vera yfirdrifin.

Starfsfólk MP banka fær heldur engin viðbótarlaun. Hins vegar kemur það til með að fá jólagjöf sem ekki er umfram það sem gengur og gerist í öðrum fyrirtækjum að sögn upplýsingafulltrúa bankans, auk þess sem starfsfólkið fær einn aukafrídag vegna þess hve jólin eru stutt þetta árið.

Landsbankinn er eini bankinn sem innir sérstaka aukagreiðslu af hendi, en auk jólagjafar líkt og í hinum bönkunum ákvað stjórn bankans að greiða öllum starfsmönnum viðbótarmánaðarlaun fyrir jólin. Upplýsingafulltrúi bankans segir að starfsmenn fái ekki greidda yfirvinnu og því megi líta á greiðsluna sem umbun fyrir þriggja ára álag við að sinna viðskiptavinum og skilmálabreyta þúsundum lána, svo dæmi séu nefnd.