Upplýsingatæknifyrirtæki setja sig í stellingar

Sjö mínútur liðu á milli tilkynninga um miklar breytingar hjá tveimur stærstu upplýsingatæknisamstæðum landsins síðasta fimmtudag.

Sjö mínútur yfir níu að morgni kom tilkynning frá Nýherja um kaup á 77 prósenta hlut í TM Software af Straumi, FL Group og Tryggingamiðstöðinni og tilboð annarra til hluthafa um kaup á því sem eftir stendur. Klukkan fjórtán mínútur gengin í tíu kom svo tilkynning Teymis um kaup á öllu hlutafé í Landsteinum Streng og Hugi Ax, um leið og félagið seldi ríflega 80 prósent af eignar­hlut sínum í Hands Holding hf.

Eftir stendur að Nýherji er í sókn og bætir við starfsemi sína um leið og Teymi skerpir áherslur í rekstri sínum með áherslu á innanlandsmarkað. Félögin tvö eru stærst á upplýsingatæknimarkaði hér. Í Hands Holding situr svo eftir rekstur utan landsteinanna Hands ASA í Noregi, Kerfi A/S í Danmörku, Kerfi AB í Svíþjóð, SCS inc. í Bandaríkjunum, og Aston Baltic í Lettlandi.

Tilviljun réð því að viðskipti þessara félaga gengu í gegn á svo til sama tíma og vakti nokkra kátínu í geiranum. Í tímasetningunni endurspeglast hins vegar þær hræringar sem eiga sér stað á þessum markaði og ljóst að hér, líkt og gerst hefur á meginlandi Evrópu síðustu ár, á sér stað samþjöppun í upplýsingatæknigeiranum. Í hrókeringum Teymis fólst svo líka sala á starfsemi Opinna kerfa hér á landi út úr Opnum kerfum Group. Frosti Bergsson fjárfestir, sem áður stýrði Opnum kerfum og seldi tæplega fimmtungshlut hlut sinn í grúppunni árið 2004, festi kaup á Opnum kerfum ehf. fyrir 1,8 milljarða króna. Lokið var við áreiðanleikakönnun vegna kaupanna síðla dags á föstudag.

Salan á TM Software kom ekki á óvart í upplýsingatæknigeiranum enda mat manna að fyrir­tækið væri í nokkurri vörn í rekstri sínum. Í vor gekk í gegn sala á Maritech, dótturfyrirtæki TM Software, til AKVA Group í Noregi, en nokkrum mánuðum fyrr hafði verið skrifað undir vilja­yfirlýsingu um kaup AKVA á sjávar­útvegshluta Maritech. Þá áttu sér stað rétt fyrir síðustu áramót breytingar í yfir­stjórn TM Software og Friðrik Sigurðsson, forstjóri félagsins til tuttugu ára, lét af störfum.

Töluverð samlegðaráhrif þykja hins vegar með Nýherja og TM Software en það síðarnefnda verður rekið sem dótturfélag Nýherja. TM Software er svo móðurfélag fimm félaga: Skyggnis, Origos, Vigors, eMR og IPT.

Tvennt er hins vegar unnið með viðskiptum Hands Holding og Teymis. Hjá Teymi verður rekstur­inn gegnsærri og skugginn af ábyrgðum vegna Hands Holding minnkar og þar með verður félagið væntanlegra álitlegri fjárfestingarkostur á markaði. Þá verða áherslur Teymis líka skarpari í því að félagið einbeitir sér að heimamarkaði eftir að hafa keypt út úr Hands Holding allan íslenskan rekstur. Um leið eru Opin kerfi hér heima seld frá samstæðunni og losnar þar um núning milli Opinna kerfa og EJS innan samstæðunnar, en milli þessara tveggja fyrirtækja hefur ætíð verið mikil samkeppni. Síðan á eftir að koma í ljós hvaða stefnu Hands Holding tekur með erlendar eignir sínar.