FIH blandast inn í stærsta fjármálahneyksli Danmerkur

FIH bankinn, sem nú er í eigu íslenska ríkisins, blandast inn í stærsta fjármálahneyksli Danmerkur í ár, IT Factory málið. Bankinn er með veð í eignum JMI Invest sem aftur var stærsti eigandi IT Factory sem nú er gjaldþrota.

Asger Jensby eigandi JMI Invest og stjórnarformaður IT Factory átti fund með yfirmönnum FIH bankans í dag þar sem farið var yfir stöðuna. Börsen.dk hefur eftir Asger að fundurinn hafi verið á jákvæðum nótum. Hinsvegar vill hann ekki gefa upp hvaða lausnir FIH setti fram til að tryggja lán sín til JMI Invest.

Það var á þriðjudag sem FIH gerði kröfu um ítarlega rannsókn á efnahag JMI Invest en deginum áður hafði IT Factory verið úrskurðað gjaldþrota. IT Factory starfaði eins og nafnið gefur til kynna sem net- og tölvufyrirtæki en talið er að nær öll starfsemin hafi verið ein svikamylla frá upphafi.

Skúrkurinn í málinu heitir Stein Bagger fyrrum forstjóri IT Factory. Hans er nú leitað af Interpol um allan heim og fregnir hafa borist af honum á stöðum á borð við Hong Kong, Bahama og Panama. Ekki einu sinni lífvörður Baggers, Hells Angels meðlimurinn Brian Sandberg, hefur hugmynd um hvar Bagger er niðurkominn.

Það var á mánudag sem Asger Jensby lýsti því yfir að IT Factory væri gjaldþrota. Þá var Bagger stunginn af frá Danmörku. Samtímis var málið kært til lögreglu. Talið er að svikamylla Baggers, og fjársvik, hafi skilað honum um 500 milljónum danskra kr. eða yfir 10 milljörðum kr. á síðustu tveimur til þremur árum.