Te hjá Te og Kaffi hækkaði um rúm 20 prósent milli mánaða

Tugprósenta verðhækkun á tei er einangrað dæmi, að sögn vörustjóra Tes og kaffis. Verðlagsbreytingar undanfarinna ára séu skýringin.

Viðskiptavinur Tes og kaffis vakti athygli á því að tiltekin te í 100 gramma pokum hefðu hækkað umtalsvert á rúmlega mánuði. Sýndi hann tvær kvittanir því til staðfestingar sem báðar urðu til eftir viðskipti við útibú Tes og kaffis í Kringlunni, þau fyrri áttu sér stað í lok ágúst og þau síðari í byrjun október.

Kvittanirnar má sjá hér að ofan. Þær bera með sér að verð tegerðanna Pina Colada og Bora Bora, sem kostuðu 895 krónur í ágúst, hafði hækkað upp í 1095 krónur mánuði síðar. Mismunurinn er 200 krónur, sem samsvarar rúmlega 22 prósenta hækkun.

Sunna Rós Dýrfjörð, vörustjóri Tes og kaffis, þekkti til hækkunarinnar þegar Vísir bar kvittanirnar undir hana. Skýringin sé sú að engar verðbreytingar hafi verið gerðar á umræddum tepokum undanfarin fjögur ár - „en á þessum tíma hafa bæði aðföng og laun hækkað töluvert,“ segir Sunna.

Hún tekur þó fram að þessi hækkun sé einangrað dæmi. Te í 100 gramma pokum á kaffihúsum Tes og kaffis sé það eina sem hækkað hafi verið í verði að þessu sinni.

Hefur þú tekið eftir sambærilegum verðbreytingum að undanförnu? Endilega sendu okkur ábendingu á netfangið ritstjorn@visir.is