Sonur Holyfields í NFL

Sonur hnefaleikakappans fyrrverandi, Evanders Holyfield, hefur samið við NFL-liðið Carolina Panthers.

Hinn tvítugi Elijah Holyfield var ekki valinn í nýliðavali NFL í síðustu viku. Panthers samdi samt við hann, og þrjá aðra leikmenn sem voru ekki valdir í nýliðavalinu, í gær.

Holyfield yngri lék með Georgíu háskólanum áður en hann ákvað að reyna fyrir sér í NFL-deildinni.

Holyfield stóð sig ekki nógu vel í prufum þar sem leikmenn sem fóru í nýliðavalið sýndu listir sínar og var ekki í hópi þeirra 25 hlaupara sem voru valdir í nýliðavalinu. Hann fékk þó samning hjá Panthers.

Faðir Holyfields var einn fremsti hnefaleikakappi heims á sínum tíma. Hann er sá eini sem hefur verið óskoraður heimsmeistari í tveimur þyngdarflokkum.

Holyfield eldri er hvað þekktastur fyrir tvo bardaga gegn Mike Tyson á árunum 1996-97. Holyfield vann fyrri bardagann en Tyson var dæmdur úr leik í þeim seinni eftir að hafa bitið Holyfield í eyrað.