Plastpokarnir fyrir grænmeti og ávexti seldir á þrjár krónur

Bónus hefur ákveðið að rukka þrjár krónur fyrir hvern plastpoka undir grænmeti og ávexti. Þetta gerir verslunin í tilefni af því að frá og með gærdeginum er bannað samkvæmt lögum að gefa poka. Bónus greinir frá þessu á Facebook-síðu sinni og hvetur alla til að koma með eða fjárfesta í margnota netapokum fyrir þessar vörur.

Aðilar um allt land hafa tilkynnt viðskiptavinum sínum um breytingarnar. Subway bíður til dæmis plastpoka til sölu í stað þess að gefa. Fram kemur í verslunum samlokurisans að allur ágóði af pokasölu renni til góðgerðamála.

Plastpokabann var samþykkt á Alþingi í maí. Samkvæmt banninu er verslunum óheimilt að afhenda viðskiptavinum burðarpoka án endurgjalds. Bannið nær til allrar afhendingar burðarpoka og skiptir ekki máli úr hvaða efni þeir eru.

Bannið er ekki algjört bann við plastpokum en slíkt bann tekur gildi þann 1. janúar árið 2021. Þá verður bannað að afhenda burðarpoka úr plasti og skiptir engu hvort sé greitt fyrir þá eða ekki. Hins vegar verður heimilt að afhenda burðarpoka úr öðru en plasti eftir að það bann tekur gildi, þó aðeins gegn endurgjaldi.

Bannið nær til allra þeirra burðarpoka sem innihalda eitthvert magn plasts en ekki til pappírspoka eða maíspoka sem eru lífbrjótanlegir. Slíka poka má afhenda gegn endurgjaldi frá og með 1. september og því verður engin breyting þar á.