Helmingi fleiri ferðamenn frá Asíu

Asískum ferðamönnum á Íslandi fjölgaði um 53 prósent á milli ára, sé nýliðinn nóvembermánuður borinn saman við sama mánuð í fyrra. Fjölgunin skýrist einna helst af fjölgun Kínverja og Japana; kínverskum ferðamönnum fjölgaði um 47,5 prósent frá fyrra ári á meðan Japöpunum fjölgaði um næstum 64 prósent.

Þetta er meðal þess sem kemur fram í nýrri Hagsjá Landsbankans, þar sem bent er á að þessi aukning kemur í kjölfar 15 prósent fjölgunar í sama hópi í október. „Það hefur verið fremur regla en undantekning að Asíubúum hafi farið fjölgandi á þessu ári en einungis eru tveir mánuðir þar sem þeim fækkaði milli ára en þetta var í september og apríl,“ eins og þar segir.

Þessi fjölgun hefur vegið upp á móti færri heimsóknum annarra ferðamanna. Sé litið til brottfara erlendra ferðamanna frá Leifsstöð fækkaði þeim um 11,6 prósent milli nóvembermánaða, sem er minnsta fækkun sem greinst hefur síðan WOW air fór í þrot í lok mars. Til samanburðar nam fækkun ferðamanna 18,4 prósentum í október og 20,7 prósentum í september.

Frökkum fjölgar, Kanar hverfa

Mesta fækkunin hefur verið í hópi ferðamanna frá Norður-Ameríku, sem skýrist hvað helst af minna framboði flugsæta til og frá Bandaríkjunum og Kanada. Hlutdeild WOW í Norður-Ameríkuflugi var enda meiri en hlutdeild þess í flugi milli Íslands og Evrópu. Brottförum Bandaríkjamanna frá Leifsstöð fækkaði um 40 prósent milli nóvembermánaða og Kanadamanna um 50 prósent. „Þrír af hverjum 10 ferðamönnum sem sóttu landið heim í fyrra voru Bandaríkjamenn og skýrir mikil fækkun þeirra á þessu ári því megnið af heildarfækkun erlendra ferðamanna á þessu ári,“ segir í Hagsjánni til skýringar.

Evrópumönnum, að frátöldum Skandinövum, fjölgaði þó lítillega í Leifsstöð á milli ára. Fjölgun þeirra nam 2,5 prósentum í nóvember og skýrist það af fleiri Frökkum, Ítölum og Þjóðverjum en fjölgunin hjá þessum þjóðum nam á bilinu 20,1 til 47,6 prósentum. Nánar um þróunina í Hagsjá Landsbankans.