Firmino skaut Liverpool í úrslitin

Roberto Firmino var hetja Liverpool í undanúrslitum HM félagsliða í Katar og sendi liðið í úrslitaleikinn.

Liverpool mætti liði Monterey frá Mexíkó í undanúrslitunum í kvöld. Naby Keita kom Evrópumeisturunum yfir eftir 12 mínútur eftir frábæra sendingu Mohamed Salah. Eftir markið hafa einhverjir líklega haldið að fram undan væru erfiðar 80 mínútur fyrir Monterrey.

Það varð hins vegar ekki því þeir mexíkósku jöfnuðu eftir aðeins tvær mínútur. Það gerði Rogelio Funes Mori þegar hann skilaði boltanum í netið eftir að Allison hafði varið skot út í teiginn.

Liverpool sýndi góða takta á köflum í leiknum en náði þó ekki þeim hæðum sem liðið getur sýnt og það stefndi allt í framlengingu þar til í uppbótartíma seinni hálfeiks.

Þá skoraði varamaðurinn Firmino eftir sendingu frá Trent Alexander-Arnold og tryggði Liverpool 2-1 sigur í leiknum og farmiða í úrslitaleikinn.

Liverpool mætir Flamengo í úrslitaleiknum.