Systir Neymars byrjuð með samherja hans í landsliðinu

Systir Neymars, Rafella Santos, er byrjuð með samherja hans í brasilíska landsliðinu, Gabriel Barbosa, eða Gabigol eins og hann er jafnan kallaður.

Neymar virðist ekkert sérstaklega ánægður með samband þeirra Santos og Gabigol.

Fyrr í dag birti Neymar myndband á Instagram frá heimili sínu. Þar sást mynd af Neymar ásamt Gabriel Jesus og Gabigol frá því Brasilía varð Ólympíumeistari 2016. Búið var að líma hvítt blað yfir andlitið á Gabigol, hinum nýja mági Neymars.

Gabigol þótti gríðarlega efnilegur leikmaður og var m.a. líkt við Neymar. Inter keypti Gabigol frá Santos eftir Ólympíuleikana 2016 en hann náði aldrei að festa sig í sessi hjá ítalska liðinu.

Gabigol hefur náð sér vel á strik undanfarin tvö ár. Í fyrra lék hann sem lánsmaður með Santos og í ár hefur hann leikið með Flamengo.

Gabigol hefur skorað 35 mörk í 48 leikjum fyrir Flamengo og lék á dögunum sinn fyrsta landsleik í þrjú ár.