Fyrsti sigurinn á heimsmeistaramótinu í Overwatch í höfn

Þórgnýr Einar Albertsson skrifar 31. október 2019 18:36

Annar leikur liðsins gegn Bretum stendur nú yfir. Fylgjast má með honum hér að neðan.

Íslenska landsliðið í Overwatch vann sannfærandi sigur á Írum í fyrsta leik sínum á heimsmeistaramóti sem nú fer fram í rafíþróttinni í Kaliforníu. Þetta er í fyrsta skipti sem Íslendingar komast á lokahelgi mótsins.

Keppnisfyrirkomulagið er með þeim hætti að fyrsta liðið til þess að vinna á þremur kortum sigrar. Eftir erfiða byrjun á fyrsta kortinu sýndi íslenska liðið yfirburði sína og vann 3-0 sigur.

Stjörnuleikur hjá strákunum

Í landsliði Íslands í Overwatch eru þeir Arnaldur Ingi Stefánsson (Futhark), Finnbjörn Jónasson (Finnsi), Hafþór Hákonarson (Hafficool), Hilmar Þór Heiðarsson (SteelDragons), Kristófer Númi Valgeirsson (Númi), Sindri Már Gunnarsson (Sindri) og Snorri Hafsteinsson (SnorrLaxZ).

Finnsi og Hafficool sýndu meistaratakta í leiknum. Sannkallaðir menn leiksins að öðrum ólöstuðum. Finnsi spilaði síðastliðinn vetur með Paris Eternal í Overwatch League, sterkustu deildinni. Hafficool er svo á mála hjá Team Envy í Overwatch Contenders, eiginlegri B-deild.

Keppa næst við Breta

Leikirnir sem fara fram í kvöld eru síðasti liður umspilsins fyrir lokaúrslitin sem fara fram um helgina. Ísland er í B-riðli umspilsins og til þess að tryggja sér sæti í úrslitum þarf landsliðið að vinna lið Breta á eftir. Sigurlið þess leiks mætir svo Noregi í úrslitaleik.

Ef Ísland vinnur þessa tvo leiki fer liðið í A-riðil. Þar eru fyrir Frakkland, Bandaríkin og svo Suður-Kórea, sem hefur unnið öll heimsmeistaramót til þessa. Eitt sæti í A-riðli fer svo til sigurliðs C-riðils umspilsins sem samanstendur af Kólumbíu, Filippseyjum, Ítalíu, Indlandi, Svíþjóð og Japan.