Umfjöllun og viðtöl: Fjölnir - KR 80-99 | Öruggt hjá meisturunum eftir brösuga byrjun í Grafarvogi

Runólfur Trausti Þórhallsson skrifar
Jakob Örn Sigurðarson í leik með KR.
Jakob Örn Sigurðarson í leik með KR. Vísir/Daníel

Eftir mjög jafnan fyrri hálfleik þá voru Íslandsmeistarar KR tveimur stigum yfir, 47-45. Í síðari hálfleik sýndu þeir gæði sín, sem og Fjölnir misstu einn sinn besta mann af velli, og fór það svo að KR vann öruggan 19 stiga sigur, lokatölur 99-80 gestunum í vil. 

Heimamenn byrjuðu leikinn af miklum krafti og gáfu Íslandsmeisturunum ekkert eftir. Þegar þrjár mínútur voru eftir af 1. leikhluta var staðan nokkuð óvænt 18-13 Fjölni í vil og voru þeir enn fimm stigum yfir þegar skammt var eftir af leikhlutanum. KR-ingum tókst að jafna metin í 25-25 en heimamenn settu niður þrist alveg undir lok leikhlutans og voru því þremur stigum yfir þegar flautan gall. 

Í 2. leikhluta var boðið upp álíka veislu og voru heimamenn með yfirhöndina lungann úr leikhlutanum. Virtist það fara einstaklega illa ofan í Íslandsmeistarana og Ingi Þór Steinþórsson, þjálfari KR, var duglegur að ræðavið dómara leiksins. Dómararnir virtust ekki hafa mikinn áhuga á að spjalla við Inga og gáfu varamannabekk KR aðvörðun og hótuðu tæknivillu í kjölfarið. 

Atvik 2. leikhluta var risatroðsla Victor Moses hjá Fjölni þegar gestirnir voru fimm stigum yfir. Strax í kjölfarið settu þeir þrist og jöfnuðu metin í 38-38. Leikurinn var í járnum það sem eftir lifði leikhlutans en Íslandsmeistararnir voru á endanum tveimur stigum yfir í hálfleik. Staðan þá 47-45 KR í vil. 

Gestirnir úr Vesturbænum tóku svo öll völdin í síðari hálfleik og fóru langleiðina með að klára leikinn í 3. leikhluta. Mike Craion var nær óstöðvandi en áðurnefndur Moses hafði verið eina vörn Fjölnis gegn Craion í fyrri hálfleik. Hann var hins vegar fastur við tréverkið í síðari hálfleik. 

Fallegasta karfa leiksins leit þó dagsins ljós í 3. leikhluta en það var Jere Vucica sem átti þá viðstöðulausa troðsu (e. alley-oop) eftir sendingu Róberts Sigurðssonar. 

Það hafði lítil áhrif á gestina sem voru enn átta stigum yfir fyrir fjórða og síðasta leikhluta leiksins, staðan þá 70-62 KR í vil. Þeir létu svo kné fylgja kviði en heimamenn virtust alveg búnir á því í 4. leikhluta. Þegar hann var rétt tæplega hálfnaður voru KR-ingar komnir 18 stigum yfir og leikurinn svo gott sem búinn. 

Fór það svo að KR vann leikinn með 19 stiga mun, lokatölur 99-80 gestunum í vil í Grafarvoginum í kvöld. 

Af hverju vann KR?
Af því þeir eru sexfaldir Íslandsmeistarar. Svo einfalt er það. Nýliðarnir geta þó verið sáttir með margt í leik kvöldsins en þeir voru frábærir í fyrri hálfleik. 

Hverjir stóðu upp úr?
Hjá heimamönnum var Victor Lee Moses frábær þær mínútur sem hann spilaði en hann spilaði þó aðeins fyrri hálfleik. Moses endaði með 14 stig, fimm fráköst og tvo stolna bolta. Þá var Jere Vucic öflugur en hann skoraði 20 stig, tók níu fráköst og gaf fjórar stoðsendingar. 

Hjá KR byrjaði Jón Arnór frágærlega og endaði með 19 stig ásamt því að taka sjö fráköst og gefa tvær stoðsendingar. Mike Craion, sem var stigahæstur allra í kvöld, var með tvöfalda tvennu. Hann setti 25 stig ásamt því að taka 11 fráköst. 

Hvað gekk illa?
Varnarleikur beggja liða var frekar slakur í upphafi leiks en KR-ingar fundu þó lausnir á þeim vanda á meðan Fjölnir átti nær engin svör við sóknarleik KR, hvað þá eftir að Moses fór út af. Þá lék Craion lausum hala undir körfunni. 

Hvað gerist næst?
Ríkjandi Íslandsmeistarar KR fá Þór Þorlákshöfn í heimsókn í Vesturbæinn eftir slétta viku eða þann 24. október. Á sama tíma fara Fjölnismenn í Hafnafjörðinn þar sem þeir mæta Haukum að Ásvöllum.

Falur Harðarson: Hefðum ekki tekið hann út af í úrslitakeppninni
„Mér líður bara þokkalega. Það voru gríðarleg vonbrigði að missa Victor Moses út alveg í lokin á fyrri hálfleik,“ sagði Falur Harðarson, þjálfari Fjölnis, um tap sinna manna í kvöld.

„Eftir samtal við sjúkraþjálfara okkar ákváðum við að hvíla Victor í síðari hálfleik. Hefðum ekki tekið hann út af í úrslitakeppninni eðaí mikilvægum leik undir lok tímabils," sagði Falur og glotti er hann ræddi meiðsli Moses frekar. 

„Það er mín upplifun, við eigum eftir að gefa fullt af liðum hörkuleiki og við eigum eftir að taka nokkra leiki líka þegar við náum öllum hópnum saman,“ sagði Falur aðspurður hvort jákvæði punktur kvöldsins væri frammistaða Fjölnis framan af leik. 

„Þeir eru mjög öflugir í hraðaupphlaupum og við vorum ekki að slútta sóknum okkar nægilega vel um miðjan þriðja leikhluta og þá hlupu þeir yfir okkur. Maður hefur þrjú leikhlé og notaði þau til að reyna berja krafti í strákana sem brugðust vel við á tímabilum en KR er með gríðarlega öflugt lið,“ sagði Falur að lokum um hvað hefði farið úrskeiðis í síðari hálfleik. Hann tók þó einnig fram að hann væri nokkuð sáttur með frammistöðu sinna manna í kvöld.

Ingi Þór í leik með KR á síðustu leiktíð. Vísir/Bára

Ingi Þór: Hugarfarsbreyting í hálfleik
„Ánægður að hafa náð í tvö stig, við unnum fyrir þessum sigri og þá sérstaklega varnarlega. Það var hugarfarsbreyting í hálfleik, bættum aðeins í vörnina en við vorum að skiptast á körfum í hálfleik,“ sagði Ingi Þór um sigur sinna manna í kvöld.

„Mér fannst við vera gefa þeim of mikið af skotum sem þeir vilja fá. Við náðum að minnka það í seinni hálfleik og nýttum okkar styrkleika,“ sagði Ingi Þór ennfremur en hann tók fyrir það að KR-ingar hafi mætt kærulausir til leiks í kvöld.

„Það gladdi mig mjög að fá Kristófer á gólfið í dag og nú er bara að sjá hvernig fóturinn bregst við. Hann var í aðgerð þar sem teknar voru skrúfur úr fætinum á honum og ef hann þarf ekki að fara í aðra aðgerð þá ætti hann að komast á fullt á næstu vikum,“ sagði Ingi Þór að lokum.

Róbert Sigurðsson: KR-ingarnir voru í leik við okkur sem þeir ætluðu sér ekki að vera í
„Svekktur, við vorum inn í þessu alveg þangað til í byrjun seinni hálfleiks þegar við missum Victor Moses í einhver meiðsli og þá hrundi þetta allt saman. Það sem pirrar mig mest er hvað við vorum skelfilegir um leið og við vissum að Victor væri ekki með, þá hrundi allt,“ sagði ósáttur Róbert Sigurðsson, fyrirliði Fjölnis, eftir tap kvöldsins. 

„KR-ingarnir voru í leik við okkur sem þeir ætluðu sér ekki að vera í. Þannig þeir komu brjálaðir út í seinni hálfleikinn og við missum svo Victor í þokkabót út. Það eru þessir tveir þættir sem gera útslagið í kvöld,“ sagði Róbert að lokum um hver munurinn á liðunum var í kvöld.

Bein lýsing

Leikirnir




    Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.
    Velkomin á Vísi. Þessi vefur notar vafrakökur. Sjá nánar.