Erlent

Repúblikanar fordæma ákvörðun Trump

Samúel Karl Ólason skrifar
Donald Trump, forseti Bandaríkjanna.
Donald Trump, forseti Bandaríkjanna. AP/Carolyn Kaster
Nokkrir af helstu bandamönnum Donald Trump, forseta Bandaríkjanna, hafa fordæmt þá ákvörðun hans að draga um þúsund hermenn Bandaríkjanna frá Sýrlandi og gera Tyrkjum kleift að herja á sýrlenska Kúrda og bandamenn þeirra í Sýrlenska lýðræðishernum (SDF). Ákvörðunin var tilkynnt skyndilega í gærkvöldi og eftir símtal á milli Trump og Recep Tayyip Erdogan, forseta Tyrklands.

Trump hefur reynt að lægja öldurnar með því að hóta Tyrkjum efnahagslegri eyðileggingu.

Flestir þeir sem gagnrýna ákvörðun Trump gera það á þeim grundvelli að hann sé að yfirgefa góða bandamenn sem hafi barist með Bandaríkjunum, og fyrir, undanfarin ár og að bardagar á milli Tyrkja og Kúrda muni auka líkurnar á upprisu Íslamska ríkisins.

Sjá einnig: Kúvending eftir símtal Trump og Erdogan í gær



Meðal þeirra eru öldungadeildarþingmaðurinn Lindsay Graham, einn af helstu bandamönnum Trump. Hann sagði ákvörðunina vera „stórslys“. Graham sagði í dag að hann muni kalla eftir brottrekstri Tyrkja úr Atlantshafsbandalaginu og að þeir verði beittir refsiaðgerðum, ef þeir ráðast gegn SDF.

Mitch McConnell, leiðtogi Repúblikanaflokksins í öldungadeildinni, segir þingmenn almennt ósammála ákvörðun Trump og hvatti hann forsetann til að sýna „bandaríska forystu“. Hann sagði að átök milli Tyrkja og SDF kæmu niður á sambandi Bandaríkjanna og Tyrklands og myndu leiða til frekari einangrunar Tyrklands á heimssviðinu.



Aðrir öldungadeildarþingmenn beggja flokka, sem sitja í Utanríkismálanefnd öldungadeildarinnar gáfu frá sér yfirlýsingu í dag þar sem segja að „svik“ Trump muni hafa hræðilegar afleiðingar.

Hún muni koma verulega niður á sýrlenskum Kúrdum, draga úr trúverðugleika Bandaríkjanna og skapa valdatæmi í Sýrlandi sem hagnist ISIS-liðum. Þar að auki muni Bashar al-Assad, Rússar og Íranar hagnast á ákvörðuninni.



Ríkisstjórnin verði tafarlaust að endurskoða þá ákvörðun að endurkalla þá fáu bandarísku hermenn sem eru í Sýrlandi, þar sem vera þeirra hafi skapað mikinn frið. Án nokkurs konar samkomulags um vernd Kúrda og annarra bandamanna Bandaríkjanna, sé vera takmarkaðs fjölda hermanna á svæðinu nauðsynleg til að verja þjóðarhagsmuni Bandaríkjanna og þá hugrökku aðila sem börðust með þeim gegn ISIS.

Nikki Haley, sem var sendiherra Bandaríkjanna gagnvart Sameinuðu þjóðunum sagði Bandaríkin þurfa að standa við bakið á bandamönnum þeirra, ef forsvarsmenn Bandaríkjanna búast við því að bandamennirnir standi við bakið á þeim sjálfum.

„Að yfirgefa þá til að deyja eru stór mistök,“ sagði hún.

Sjá einnig: Trump afsalar Bandaríkjunum ábyrgð á Sýrlandsstríðinu



Kevin McCarthy, leiðtogi Repúblikana í fulltrúadeildinni, gagnrýndi ákvörðunina einnig í dag, samkvæmt AP fréttaveitunni. Hann sagðist vilja standa við loforð Bandaríkjanna gagnvart þeim sem hjálpa þeim og berjast með þeim.

Seinni partinn í dag reyndi Trump að lægja öldurnar með því að hóta Tyrkjum efnahagslegri eyðileggingu, geri þeir eitthvað sem hann, af sinni „miklu og óviðjafnanlegu“ visku telji ekki við hæfi.

„Eins og ég hef haldið sterklega fram áður, og til að ítreka, ef Tyrkir gera eitthvað sem ég, af minni miklu og óviðjafnanlegu visku, tel ekki við hæfi, mun ég algerlega rústa og útrýma efnahagi Tyrklands (Ég hef gert það áður!) Þeir verða, með Evrópu og öðrum, að standa vörð um fangaða ISIS-liða og fjölskyldur þeirra.

Bandaríkin hafa gert mun meira en nokkur gat búist við, þar á meðal að taka 100 prósent af Kalífadæmi ISIS. Það er kominn tími fyrir aðra á svæðinu, sumir sem eru mjög auðugir, að vernda þeirra eigin svæði. BANDARÍKIN ERU FRÁBÆR!“ sagði forsetinn.


Tengdar fréttir

Tyrkir áforma innrás í Sýrland

Tyrkir áforma nú innrás inn í norðausturhluta Sýrlands og Bandaríkjamenn virðast hafa gefið grænt ljós á aðgerðirnar.




Fleiri fréttir

Sjá meira


×