Eftir árangurslausar viðræður í nótt ákváðu lánadrottnar og hluthafar að leggja niður starfsemi ferðaþjónustufyrirtækisins Thomas Cook. Með því lauk 178 ára sögu fyrirtækisins. Reynt var að tryggja 200 milljóna punda innspýtingu á maraþonfundi um helgina, jafnvirði 30 milljarða króna, til þess að forða félaginu frá gjaldþroti. Í nótt varð hins vegar endanlega ljóst að það tækist ekki.

Flugmálayfirvöld á Bretlandseyjum greindu frá því á öðrum tímanum í nótt að ferðaþjónusturisinn væri þegar búinn að leggja niður starfsemi og að öllum ferðum á vegum félagsins hefði verið aflýst. Framkvæmdastjóri Thomas Cook segir niðurstöðuna sorglega og nýtti hann tækifærið í samtali við þarlenda miðla til að biðja viðskiptavini og starfsmenn fyrirtækisins afsökunar. Starfsmennirnir eru um 22 þúsund talsins, þar af 9 þúsund í Bretlandi, og talið er að þeir munu allir missa vinnuna.

Óttast er að rúmlega 600 þúsund ferðamenn séu strandaglópar vegna gjaldþrotsins en bresk stjórnvöld höfðu áður heitið því að flytja breska ferðamenn aftur til síns heima, færi svo að Thomas Cook færi í þrot. Þeir eru um 150 þúsund talsins og segja breskir fjölmiðlar því að nú fari í hönd umfangsmestu björgunaraðgerðir sem bresk stjórnvöld hafa staðið fyrir síðan í seinna stríði.

Matterhorn-aðgerðin

Boris Johnson, forsætisráðherra Bretlands, hefur þegar heitið því að öllum breskum strandaglópum verði komið á áfangastað sinn. Búið sé að leigja tugir flugvéla til verksins og flaug hluti þeirra af stað í gær. Viðskiptavinir Thomas Cook hafa verið hvattir til að breyta ekki ferðaáætlunum sínum þrátt fyrir gjaldþrotið. Þeim verði komið heim við fyrsta tækifæri, þeim að kostnaðarlausu. Björgunaraðgerðin gengur undir nafninu „Operation Matterhorn.“

Thomas Cook var ein stærsta ferðaskrifstofa í heimi og bauð meðal annars upp á ferðir til Evrópu, Karíbahafsins, Bandaríkjanna og Mið-Austurlanda. Þá hafa verið farnar ferðir á skemmtiferðaskipum til Íslands og Grænlands. 

Fjárhagsstaða Thomas Cook hefur lengi verið áhyggjuefni og námu skuldir félagsins um 265,5 milljörðum króna við gjaldþrotið. Nokkrir þættir hafa haft geigvænleg áhrif á reksturinn; má þar til að mynda nefna Brexit-áhyggjur, hátt verð þotueldsneytis og hótelherbergja. Þá varð fyrirtækið fyrir miklu höggi í sumar og fyrrasumar þegar miklar hitabylgjur riðu yfir og stór hluti viðskiptavina afbókaði.