Viðskipti innlent

Segir vaxtalaus bílalán enga sjónhverfingu

Stefán Ó. Jónsson skrifar
Benedikt Eyjólfsson hjá Bílabúð Benna segir fyrirtækið heldur vilja verja peningum í að bjóða upp á lán sem þessi, frekar en að stunda hefðbundið, kostnaðarsamt markaðsstarf.
Benedikt Eyjólfsson hjá Bílabúð Benna segir fyrirtækið heldur vilja verja peningum í að bjóða upp á lán sem þessi, frekar en að stunda hefðbundið, kostnaðarsamt markaðsstarf. Vísir/vilhelm

Bílabúð Benna býður nú 0 prósent vexti á völdum notuðum bílum. Áður hefur verið boðið upp á sambærileg bílalán sem þóttu varhugaverð, nefndarformaður á Alþingi varaði til að mynda við þeim. Eigandi Bílabúðar Benna segir þó ekkert hanga á spýtunni.

„Núll prósent vextir, allt að 80% fjármögnun í allt að 24 mánuði af völdum bílum.“ Svona er nýju lánunum lýst á vefsíðu Bílabúðar Benna, aukinheldur séu engin lántökugjöld. Þetta skili sér í „hraðari eignamyndun“ og „lægri mánaðagreiðslum.“

Á vefsíðunni má nálgast lista yfir þá bíla sem kaupa má á þessum kjörum. Sé tekið dæmi af Toyota Yaris sem kostar 1,5 milljón næmu mánaðagreiðslurnar 50 þúsund krónum, taki kaupandinn 80 prósent lán til 24 mánaða.

Kjaravextirnir „sjónhverfing“

Þetta er ekki eina bílalánaútspilið sem vakið hefur athygli á síðustu vikum. Þannig þótti tíðindum sæta, svo miklum að þau rötuðu á forsíðu Morgunblaðisins, að BL byði nú upp á 3,95 prósent vexti á bílalánum sem kynntir voru sem kjaravextir. „Þú greiðir lægri vexti, enga verðtryggingu, ekkert lántökugjald og lægri afborgun á mánuði. Eignamyndun verður hraðari og endanlegur kostnaður yfir lánstímann getur orðið meira en helmingi lægri en af hefðbundnu bílaláni,“ eins og það er kynnt á vefsíðu BL. 

Sitt sýndist þó hverjum um lánin. Þannig lýsti Egill Jóhannsson, framkvæmdastjóri Brimborgar, lánunum sem „sjónhverfingu.“ Engar kjarabætur væru fólgnar í hinum svokölluðu kjaravöxtum, í sumum tilvikum væru lánin jafnvel óhagstæðari en hefðbundin bílalán.

„Það er ekki verið að lækka vexti heldur er verið að færa hluta af afslætti sem mjög oft er gefinn af bílverði yfir til Lykils fjármögnunarfélags,“ sagði Egill í Vikulokunum. „Afslátturinn sem þeir hefðu mögulega gefið af nýja bílnum er þá notaður til að fjármagna þessi afföll.“

Frosti Sigurjónsson varaði við vaxtalausum bílalánum BL árið 2014. Vísir/Stefán/pjetur

Vaxtalaust en ekki ókeypis

Egill setti þetta í samhengi við vaxtalaus bílalán sem BL bauð upp á árið 2014. Þau þóttu einnig gagnrýniverð; hið minnsta fjórum bílaumboðum og þáverandi formanni efnahags- og viðskiptanefndar Alþingis þótti lítið til þeirra koma. Þau væru alls ekki ókeypis enda byðust þau aðeins þeim sem afsöluðu sér öðrum afslætti af bílunum. 

Benedikt Eyjólfsson, eigandi Bílabúðar Benna, segir að hin nýju lán fyrirtækisins séu frábrugðin þessum lánum BL. Lántakendur fyrirgeri sér ekki réttinum til afsláttar og bendir hann á fyrrnefnda vefsíðu Bílabúðar Benna því til sönnunar.

Aðspurður um hvort krafan um að lánið sé greitt á 24 mánuðum leiði ekki til íþyngjandi greiðslubyrði segir Benedikt að kaupendur geti dreift láninu yfir lengri tíma. Núll prósent vextirnir eigi þó aðeins við um fyrstu 24 mánuðina. „Ef fólki vantar kannski milljón til eignast bíl þá ætti ekki að vera mikið mál að ráða við það á tveimur árum,“ segir Benedikt. Það geri rúmlega 41 þúsund króna greiðslu á mánuði.

Hann segir ekkert hanga á spýtunni og óttast því ekki að lántakan sæti sömu gagnrýni og fyrrnefnd lán BL. „Gagnrýni er alltaf af hinu góða, sé rýnt til gagns,“ segir Benedikt. „Þetta er bara ein leið til þess að auðvelda fólki að eignast bíl. Vonandi stekkur fólk á þetta, við erum alla vega sátt með að selja bílana á þessum kjörum.“


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
KVIKA
3,1
5
46.200
MAREL
3,07
22
584.666
REGINN
2,35
5
48.606
EIK
2,15
6
82.684
FESTI
2,14
10
143.706

Mesta lækkun dagsins


Félag
Br.%
Fjöldi
Velta*
ICEAIR
-0,72
12
29.385
Velkomin á Vísi. Þessi vefur notar vafrakökur. Sjá nánar.